اسلام آباد(نیشنل ٹائمز)برطانوی رکن پارلیمنٹ کلاڈیا ویب کا کہنا ہے کہ پاکستان میں 7ہزار 253 گلیشیئرز ہیں، جو سب تیزی سے پگھل رہے ہیں۔یہ بات برطانوی رکن پارلیمنٹ کلاڈیا ویب نے پاکستان میں حالیہ سیلاب کے باعث ہونے والی ہلاکتوں اور تباہی کے تناظر میں سماجی رابطے کی ویب سائٹ ٹوئٹر پر جاری کیے گئے بیان میں کہی ہے۔ان کا کہنا ہے کہ قطب شمالی کے بعد پاکستان میں سب سے زیادہ گلیشیئرز ہیں۔برطانوی رکنِ پارلیمنٹ کا کہنا ہے کہ گرین ہاؤس گیسز کے عالمی اخراج میں پاکستان کا حصہ صرف 1 فیصد ہے۔انہوں نے مزید کہا ہے کہ ماحولیاتی تبدیلیوں میں پاکستان سرِ فہرست 10 ممالک میں شامل ہے۔برطانوی رکنِ پارلیمنٹ کلاڈیا ویب کا یہ بھی کہنا ہے کہ پاکستان ہمارے لالچ کی قیمت چکانے پر مجبور ہے۔