اسلام آباد(نیشنل ٹائمز)جاپان کی پہلی خاتون فوٹو جرنلسٹ اور مایہ ناز فوٹوگرافر سونیکو ساساموتو 107 برس کی عمر میں انتقال کر گئیں۔غیر ملکی میڈیا کی رپورٹس کے مطابق سونیکو ساساموتو اپنی 108 ویں سالگرہ سے صرف 2 ہفتے قبل 15 اگست کو انتقال کر گئیں۔جاپان کی پہلی خاتون فوٹو جرنلسٹ 1914ء میں ٹوکیو میں پیدا ہوئیں، وہ مصور بننا چاہتی تھیں لیکن والد کی جانب سے انکار کے بعد انہوں نے فوٹوگرافی کا انتخاب کیا اور 1940ء میں فوٹوگرافک ایسوسی ایشن آف جاپان میں شمولیت اختیار کی۔خاتون فوٹو جرنلسٹ کے موضوعات دوسری جنگِ عظیم کے بعد جاپان پر امریکی قبضے کی نگرانی کرنے والے جنرل ڈگلس میک آرتھر سے لے کر کوئلے کی کان میں کام کرنے والوں کی بیویوں تک مختلف شعبوں پر مشتمل تھے۔غیر ملکی خبر رساں ایجنسی کی رپورٹ کے مطابق خاتون فوٹو جرنلسٹ نے ایک انٹرویو میں لمبی عمر کا راز بتاتے ہوئے کہا تھا کہ ’ہر رات ایک گلاس ریڈ وائن اور ہر روز چاکلیٹ کا ایک ٹکڑا میری لمبی عمر کے راز میں شامل ہے‘۔انہوں نے اُس انٹرویو میں مزید کہا تھا کہ ’آپ کو کبھی سست نہیں ہونا، اپنی زندگی کے بارے میں ہمیشہ مثبت رہنا ضروری ہے‘۔سونیکو ساساموتو کا یہ بھی کہنا تھا کہ ’کبھی ہمت نہ ہاریں، آپ کو آگے بڑھنے اور آگاہ رہنے کی ضرورت ہے تاکہ آپ آگے بڑھ سکیں‘۔