اسلام آباد(نیشنل ٹائمز)فالج ایسا مرض ہے جس کے شکار فرد کا فوری علاج نہ ہو تو موت کا خطرہ بہت زیادہ بڑھ جاتا ہے۔امریکن ہارٹ ایسوسی ایشن (اے ایچ اے) نے ایک نئی رپورٹ میں اس جان لیوا بیماری کی علامات پر روشنی ڈالی ہے۔جرنل سرکولیشن میں شائع رپورٹ میں دل کی شریانوں سے جڑے امراض بشمول فالج کی علامات کے حوالے سے تازہ ترین تفصیلات بیان کی گئیں۔فالج کی 2 اقسام ہیں ایک برین ہیمرج جس میں دماغی شریان پھٹ جاتی ہے جبکہ دوسری قسم میں دماغ کو خون پہنچانے والی شریان بلاک ہوجاتی ہے جس سے آکسیجن کی کمی ہوتی ہے اور دماغ کو نقصان پہنچتا ہے۔اے ایچ اے کے مطابق فالج کی علامات سے واقفیت اور اس کے مطابق ردعمل ظاہر کرنا ضروری ہے، کیونکہ بروقت علاج سے موت اور طویل المعیاد معذوری کا خطرہ کم کیا جاسکتا ہے۔فالج کا سامنا ہر فرد کو ہوسکتا ہے مگر اس کا خطرہ ہر فرد کے لیے مختلف ہوتا ہے۔55 سال کی عمر کے بعد ہر 10 سال بعد فالج کا خطرہ دگنا بڑھ جاتا ہے جبکہ ذیابیطس، ہائی بلڈ پریشر، موٹاپے اور ہائی کولیسٹرول سے بھی فالج کا خطرہ بڑھتا ہے۔فالج کی عام ترین علاماتفالج کی یہ عام علامات اچانک نمودار ہوتی ہیں جس کے دوران جسم کا ایک حصہ سن ہوجاتا ہے یا چلنا ممکن نہیں ہوتا، بات کرنا مشکل ہوجاتا ہے یا لوگوں کی بات سمجھ نہیں آتی، ایک جانب سے چہرہ ڈھلک جاتا ہے اور مسکرانا ممکن نہیں ہوتا، ذہنی الجھن، سر چکرانا اور ایک یا دونوں آنکھوں کی بینائی تبدیل ہوجانے جیسی علامات کا سامنا ہوسکتا ہے۔کم عام علاماتاے ایچ اے کی رپورٹ کے مطابق ایک چیز 2 نظر آنا، لمس محسوس نہ کرپانا، تکلیف یا جسمانی درجہ حرارت بڑھ جانا کم عام علامات ہیں۔رپورٹ میں مزید بتایا گیا کہ اس حوالے سے مزید تحقیق کی ضرورت ہے کہ مختلف خطوں میں فالج کی علامات کیا ہوتی ہیں۔رپورٹ کے مطابق مردوں کے مقابلے میں خواتین میں کم عام علامات کا امکان زیادہ ہوتا ہے۔خواتین میں فالج کی علامات مختلف ہوسکتی ہیں جیسے سردرد، ذہنی کیفیت بدل جانا، کوما اور شعور نہ رہنا وغیرہ۔