اسلام آباد (نیشنل ٹائمز)پاکستان شوبز انڈسٹری کی سابقہ اداکارہ نور بخاری نے دُعا زہرا کو اُن کے والدین سے نہ ملوانے پر شدید برہمی کا اظہار کیا ہے۔سوشل میڈیا پر نور بخاری کا ایک ویڈیو پیغام وائرل ہورہا ہے جس میں اُنہوں نے کہا کہ ’دُعا زہرا کو والدین سے ملنے ہی نہیں دیا جارہا، والدین سے ملنے تو دیں، کیا پتا ایک ملاقات سے تمام معاملات ٹھیک ہوجائیں‘۔سابقہ اداکارہ نے صارفین سے اپیل کرتے ہوئے کہا کہ ’آپ سب بھی دُعا زہرا کے والدین کا ساتھ دیں، اُن کی آواز بنیں‘۔اُنہوں نے اعلیٰ حکام سے درخواست کرتے ہوئے کہا کہ ’دُعا کی اُس کے والدین کے ساتھ ایک تفصیلی ملاقات کروائی جائے تاکہ یہ مسئلہ حل ہوسکے‘۔نور بخاری نے مزید کہا کہ ’بچی کو والدین سے ملوانا بہت ضروری ہے کیونکہ میں بھی ایک ماں ہوں، اعلیٰ حکام کو اس پر توجہ دینی چاہیے‘۔واضح رہے کہ کراچی سے لاہور جا کر پسند کی شادی کرنے والی دعا زہرا کو سندھ ہائیکورٹ نے اپنی مرضی سے فیصلہ کرنے کی اجازت دے دی ہے۔عدالت نے کیس کا تحریری حکم نامہ جاری کرتے ہوئے کہا تھا کہ بیان حلفی کی روشنی میں عدالت اس نتیجے پر پہنچی ہے کہ دعا زہرا مرضی سے جس کے ساتھ جانا چاہے یا رہنا چاہے، رہ سکتی ہے۔