اسلام آباد (نیشنل ٹائمز)مشرقی یورپ کے ملک لیتھوانیا کے شہریوں نے یوکرین کو جدید لڑاکا ڈرون خرید کر دینے کے لیے 50 لاکھ یورو جمع کرلیے۔غیر ملکی میڈیا کی رپورٹ کے مطابق یہ رقم صرف ساڑھے تین دن میں جمع کی گئی جس میں ہزاروں افراد نے حصہ ڈالا۔لیتھوانیا کے ایک نجی ٹی وی نے اس مہم کا آغاز کیا تھا تاکہ ’’بائیراکتر ٹی بی 2‘‘ نامی عسکری ڈرون خریدا جاسکے۔شام اور لیبیا کے تنازعات میں روسی فوج کے خلاف یہ ڈرون پہلے بھی استعمال کیا جاچکا ہے۔ڈرون خریدنے کے لیے رقم جمع کرنے کی مہم کی منصوبہ بندی لیتھوانیا کی وزارت دفاع نے کی تھی جو اگلے ہفتے ترکی سے ڈرون خریدے گی۔لیتھوانیا میں تعینات یوکرینی سفیر نے کہا کہ یہ تاریخ کا پہلا موقع ہوگا کہ جب عام لوگوں نے دوسرے ملک کی فوج کو اسلحہ کی خریداری کے لیے رقم اکٹھی کی۔