ریاض(نیوز ڈیسک) سعودی وزارت افرادی قوت و سماجی بہبود نے ماہ رمضان کے لیے ڈیوٹی ٹائمنگ 5 گھنٹے مقرر کر دیے ہیں۔تفصیلات کے مطابق سعودی عرب میں رمضان کے مقدس مہینے کے لیے ڈیوٹی ٹائمنگ روزانہ صبح 10 سے سہ پہر 3 بجے تک ہوگی۔وزارت افرادی قوت کے مطابق رمضان المبارک کے دوران دفاتر میں حاضری دینے والوں کو 3 گروپس میں تقسیم کیا گیا ہے۔پہلا گروپ صبح ساڑھے 9 سے ڈھائی بجے تک ڈیوٹی انجام دے گا، دوسرا گروپ صبح ساڑھے 10 سے ساڑھے 3 بجے تک، جب کہ تیسرا گروپ 11 بج کر 30 منٹ سے ساڑھے 4 بجے تک ڈیوٹی انجام دے گا۔خیال رہے کہ وزارت افرادی قوت نے مملکت میں سرکاری اداروں میں پہلے ہی ایک لچک دار ڈیوٹی نظام نافذ کیا ہے، جو دفاتر میں حفاظتی تدابیر پر مشتمل ہے، جس کا مقصد کرونا وبا کے پھیلاؤ کو روکنا ہے۔لچک دار ڈیوٹی نظام کے تحت آن لائن کام کرنے والے ملازمین کا تناسب25 فی صد رکھا گیا ہے، نیز وہ افراد جنھیں کرونا وائرس لگنے کا زیادہ خطرہ لاحق رہتا ہے، ان پر آن لائن ڈیوٹی انجام دینے کی پابندی ہے۔