اسلام آباد(نیشنل ٹائمز)جنگ زدہ ملک یوکرین میں فوجی نے چیک پوسٹ پر ہی گرل فرینڈ کو شادی کی پیشکش کردی جس کی ویڈیو سوشل میڈیا پر وائرل ہوگئی۔یوکرین میں روسی حملے شدت اختیار کرگئے ہیں اور افراتفری کے باعث شہری اپنے ملک سے بھاگنے پر مجبور ہوگئے ہیں، یوکرین سے آنے والی تمام خوفناک خبروں کے درمیان، یوکرین کے ایک فوجی کی اپنی گرل فرینڈ کو پرپوز کرنے کی ویڈیو وائرل ہورہی ہے جس نے لوگوں کے دل جیت لیے ہیں۔سوشل میڈیا پر وائرل ہونے والی ویڈیو میں دیکھا جاسکتا ہے کہ یوکرین کے فوجیوں کا گروپ ایک کار کو چیک پوسٹ پر روک کر اس کی تلاشی لے رہے ہیں، کار میں سوار تمام افراد باہر نکل کر منہ گاڑی کے شیشوں کی طرف کرکے ہاتھ اٹھا کر کھڑے ہیں۔تلاشی کے دوران، ایک فوجی اہلکار اپنی گرل فرینڈ کے پیچھے گھٹنوں کے بل جُھک کر بیٹھ جاتا ہے، اُس کے ہاتھ میں انگوٹھی ہوتی ہے جبکہ دوسرے ہاتھ میں پھول ہوتے ہیں جو فوجی اہلکار نے چُھپائے ہوتے ہیں۔فوجی اہلکار کی گرل فرینڈ، جب پیچھے مُڑ کر دیکھتی ہے تو وہ اپنے بوائے فرینڈ کو گھٹنوں کے بل بیٹھے دیکھ کر خوشی سے جھوم اُٹھتی ہے۔گرل فرینڈ کو دیکھتے ہی فوجی اہلکار، اُسے پروپوز کرنے کے لیے انگوٹھی پہناتا ہے اور پھر پھول دیتا ہے۔دوسری جانب چیک پوسٹ پر موجود دیگر فوجی اہلکار، اس منظر کی ویڈیو بناتے نظر آئے۔