کیف (نیشنل ٹائمز) یوکرین کے وزیر خارجہ دمتری کولیبا کا کہنا ہے کہ ان کا ملک اپنی زمین کا ایک انچ بھی کسی کو نہیں دے گا۔الجزیرہ ٹی وی کے مطابق روس کے ساتھ مذاکرات کے اعلان کے بعد یوکرینی وزیر خارجہ نے کہا کہ ہم مذاکرات میں روس کا موقف سننے جا رہے ہیں، ہم کسی معاہدے کیلئے نہیں بلکہ یہ بتانے جا رہے ہیں کہ ہم روس کے حملے کے بارے میں کیا سوچتے ہیں۔انہوں نے کہا کہ بیلاروس نے یقین دہانی کرائی ہے کہ یوکرین کے خلاف بیلاروس کی فوج استعمال نہیں ہوگی، ہم یہ امید ہی کرسکتے ہیں کہ بیلاروسی صدر اپنی بات پر قائم رہیں۔یوکرینی وزیر خارجہ نے واضح کیا کہ وہ ا ب ، مذاکرات کے دوران اور مذاکرات کے بعد بھی اپنے ملک کا دفاع کرتے رہیں گے۔خیال رہے کہ اس سے قبل یہ خبریں سامنے آئی تھیں کہ یوکرین اور روس کے حکام نے پڑوسی ملک بیلاروس میں مذاکرات پر رضا مندی ظاہر کی ہے۔