اسکردو(نیوز ڈیسک) گلگت بلتستان کے علاقے نلتر میں مسافر گاڑی پر فائرنگ کرنے والے ملزمان کو قانون نافذ کرنے والے اداروں نے گرفتار کرلیا۔ گلگت بلتستان کے علاقے نلتر میں پیش آنے والے واقعے پر قانون نافذ کرنے والے اداروں نے فوری کارروائی کرتے ہوئے تین اہم ملزمان کو گرفتار کیا۔ذرائع کے مطابق حراست میں لیے جانے والے تینوں ملزمان نے اپنے جرم کا اعتراف بھی کرلیا۔واضح رہے کہ گزشتہ روز گلگت کے علاقے نلتر بالا جانے والی مسافر وین پر نامعلوم افراد نے اندھا دھند فائرنگ کی تھی جس کے نتیجے میں 6 مسافر جاں بحق جبکہ بچوں اور خواتین سمیت7زخمی ہوئےتھے۔واقعے کے بعد گلگت بلتستان کے عمائدین اور علمائے کرام نے واقعےکو فرقہ ورانہ رنگ دینے سے روکنےکامطالبہ کیا، عمائدین نے تمام جماعتوں کو ایک جگہ بیٹھا کر معاملے کو افہام و تفہیم سے حل کیا۔وزیراعلیٰ جی بی خالدخورشید نے واقعےکا نوٹس لے کر فوری کارروائی کاحکم دیا اور قراقرم ہائی وے پر مسافروں کی حفاظت یقینی بنانے کی ہدایت کی تھی۔