اسلام آباد(نیوز ڈیسک)سینئر اداکارہ عتیقہ اوڈھو نے ڈرامہ نگار حسینہ معین کے انتقال پر افسوس کا اظہار کرتے ہوئے کہا کہ ان کے انتقال کی خبر ناقابلِ یقین ہے۔عتیقہ اوڈھو نے سوشل میڈیا پر جاری پیغام میں کہا کہ ‘حسینہ آپا آج دنیا چھوڑ گئیں، ان کی موت کی خبر ناقابلِ یقین ہے کیونکہ وہ اپنے آخری وقت تک عملی طور پر سرگرم رہیں۔انہوں نے کہا کہ حسینہ معین آخری وقت تک جوش و جذبے سے سرشار تھیں، ان کی موت بلاشبہ ہمارے لئے ایک ناقابلِ تلافی نقصان ہے۔عتیقہ اوڈھو نے یہ بھی کہا کہ حسینہ معین کو ہمیشہ یاد رکھا جائےگا۔واضح رہے کہ معروف ڈرامہ نویس، مصنفہ اور مکالمہ نگار حسینہ معین 79 برس کی عمر میں حرکت قلب بند ہونے سے انتقال کرگئیں۔ڈرامہ نگار حسینہ معین کے بھتیجے سعید کا کہنا ہے کہ حسینہ معین لاہور جانے کے لیے تیار ہو رہی تھیں کہ اچانک دل کا دورہ پڑا۔حسینہ معین 20 نومبر1941ء کو بھارت کے شہر کانپور میں پیدا ہوئیں، انہوں نے ابتدائی تعلیم کانپور سے حاصل کی۔