اسلام آباد(نیشنل ٹائمز) معروف پاکستانی اداکار احسن خان کا کہنا ہے کہ وہ ڈراموں میں ایسے کردار ادا کرتے ہیں جن سے معاشرے کو کوئی آگاہی مل سکے۔احسن خان نے برطانوی نشریاتی ادارے کو خصوصی انٹرویو دیتے ہوئے ڈراموں میں اپنے کرداروں کے حوالے سے بات کی۔اُنہوں نے اپنے حال ہی میں نشر ہونے والے ڈراموں کے بارے میں بات کرت ہوئے کہا کہ’ ڈراموں میں ہم کئی بار ایسا کچھ دِکھانا چاہتے ہیں کہ بس آپ اس پہلو کو چھیڑ دیں اجاگر کردیں تاکہ لوگوں کو اس سے کوئی آگاہی حاصل ہوسکے۔اُنہوں نے حال ہی میں نشر ہونے والے اپنے ڈرامے’قصّہ مہربانو‘ کے بارے میں بات کرتے ہوئے کہا کہ’ اس ڈرامے کی کہانی کو دِکھانے کا مقصد صرف یہ تھا کہ کم ازکم اس موضوع پر بات کی جائےتاکہ اگر کوئی میریٹل ریپ جیسی زیادتی کا شکار ہےتو لوگوں کو پتاچل سکے کہ یہ پاکستان میں قانونی طور پر بھی ایک غلط چیز ہےاور یہ اخلاقیات کے زمرے میں بھی نہیں آتا‘۔اُنہوں نے مزید کہا کہ’بس اسی لیے اس موضوع پر بات کی گئی اور اس ڈرامے کے نشر ہونے کے بعد اس حوالے سے ایک بحث شروع بھی ہوگئی ہے‘۔احسن خان کا کہنا ہے کہ’ اس حوالے سے بات کرنا بہت ضروری ہے لیکن لوگ شاید اس بارے میں بات کرنے سے تھوڑا شرماتے ہیں اور گھبراتے ہیں‘۔