اسلام آباد(نیشنل ٹائمز)پاکستان فلم و ٹی وی انڈسٹری کی معروف اداکارہ عائشہ عمر نے انکشاف کیا ہے کہ کالج کی محبت سے اُن کی شادی نہ ہو سکی لیکن وہ شخص اب اُن کے بہت اچھے دوست ہیں۔حال ہی میں عائشہ عمر نے جیو نیوز کے پروگرام ’جشنِ کرکٹ‘ میں بطورِ مہمان شرکت کی جہاں اُنہوں نے میزبان کے مختلف سوالات کے جواب دیئے۔ایک سیگمنٹ کے دوران میزبان شہزاد اقبال نے اداکارہ سے سوال کیا کہ ’کتنے فیصد پاکستانی یہ سمجھتے ہیں کہ کالج کی محبت کا اختتام شادی پر ہی ہوتا ہے؟‘اس سوال کے جواب میں عائشہ عمر نے کہا کہ ’15 فیصد پاکستانی یہ سمجھتے ہیں کہ کالج کی محبت کا اختتام شادی پر ہوتا ہے۔اس دوران عائشہ عمر نے انکشاف کیا کہ ’اُنہیں بھی کالج میں ایک شخص سے محبت ہوئی تھی، دونوں ایک دوسرے سے محبت کرتے تھے اور کالج میں بھی اُن کی لو اسٹوری کے خوب چرچے تھے۔‘عائشہ عُمر نے کہا کہ ’اس شخص کی شادی ہوگئی کیونکہ وہ خود اُس وقت شادی کے لیے رضامند نہیں تھیں۔‘اداکارہ نے کہا کہ ’میری اُن سے شادی نہیں ہوئی لیکن وہ میرے بہت اچھے دوست ہیں اور میں اُن کے لیے بہت خوش ہوں۔‘اُنہوں نے کہا کہ ’اگر وہ مجھے اس وقت دیکھ رہے ہوں گے تو اُنہیں معلوم ہوجائے گا کہ میں اُن کے بارے میں ہی بات کر رہی ہوں۔‘عائشہ عُمر نے مزید کہا کہ ’بریک اپ کا فیصلہ، ہم دونوں کا مشترکہ تھا۔‘