دبئی (نیشنل ٹائمز)ٹی20 ورلڈ کپ کے سپر12 رئوانڈ میں گروپ 1 سے انگلینڈ اور آسٹریلیا نے سیمی فائنل کے لیے کوالیفائی کر لیا۔ ہفتہ کو ہونے والے میچز سے قبل انگلینڈ کی ٹیم اپنے چاروں میچز جیت کر گروپ میں سرفہرست تھی لیکن اس کے باوجود اس نے سیمی فائنل کے لیے کوالیفائی نہیں کیا تھا۔اسی طرح آسٹریلیا اور جنوبی افریقہ نے تین، تین میچوں میں فتح حاصل کر رکھی تھی لیکن ان دونوں کی سیمی فائنل رسائی کا دارومدار رن ریٹ پر تھا۔ آسٹریلیا نے ویسٹ انڈیز کو یکطرفہ مقابلے کے بعد شکست دے کر چوتھی کامیابی حاصل کرنے کے ساتھ ساتھ سیمی فائنل میں رسائی کی امیدیں بھی روشن کر لی تھی۔اب ان تینوں ٹیموں کی سیمی فائنل تک رسائی کا دارومدار جنوبی افریقہ اور انگلینڈ کے درمیان میچ کے نتیجے پر تھا۔جنوبی افریقہ نے انگلینڈ کے خلاف پہلے کھیلتے ہوئے 189رنز بنائے اور سیمی فائنل میں رسائی کے لیے انہیں انگلینڈ کے خلاف کم از کم 58رنز سے کامیابی حاصل کرنی تھی۔تاہم جنوبی افریقہ کی ٹیم انگلینڈ کو 131 رنز تک محدود نہ رکھ سکی اور انگلینڈ نے آسٹریلیا کے ہمراہ سیمی فائنل کے لیے کوالیفائی کرنے کیساتھ ساتھ گروپ میں ٹاپ بھی کر لیا۔10 نومبر کو پہلے سیمی فائنل میں انگلینڈ کا سامنا نیوزی لینڈ یا بھارت میں سے کسی ایک ٹیم سے ہو گا جبکہ پاکستان کی ٹیم ممکنہ طور پر آسٹریلیا کے مدمقابل ہو گی۔سیمی فائنل میں پاکستان اور آسٹریلیا کا مقابلہ 11 نومبر کو دبئی میں ہو گا۔