ویب ڈیسک(نیشنل ٹائمز)برطانیہ کے دو بڑے ہوائی اڈوں ہیتھرو اور برمنگھم کو بم سے اڑانے کی دھمکیاں ملنے کے بعد سکیورٹی ادارے متحرک ہوگئے۔

بم دھمکیوں کے باعث یورپ کے مختلف شہروں سے آنے اور جانے والی کم از کم 12 پروازوں کا رخ تبدیل کیا گیا۔ کوپن ہیگن، ہیلسنکی، میڈرڈ، میلان اور وارسا سے متعلق پروازوں کو بھی دھمکیاں موصول ہوئیں۔

نیوکاسل اور گلاسگو سے پراگ پہنچنے والی ایزی جیٹ کی پروازوں کو پولیس نے گھیرے میں لے کر سکیورٹی خدشات کے پیش نظر دونوں طیاروں کی تلاشی لی۔ ایزی جیٹ کے مطابق دونوں پروازوں کے مسافر معمول کے مطابق طیاروں سے اتر گئے۔

دوسری جانب ڈبلن سے روم جانے والی ایک پرواز کا رخ فرانس کے فوجی اڈے کی جانب موڑ دیا گیا جہاں طیارے کی تلاشی کے دوران کوئی مشکوک چیز برآمد نہیں ہوئی۔

بم دھمکیوں کے باوجود ہیتھرو اور برمنگھم ائیرپورٹس پر فضائی آپریشن معمول کے مطابق جاری رہا۔حکام نے دھمکیوں کو غیر معتبر قرار دیا۔