بیجنگ (شِنہوا) چین میں بدھ کے روز قومی دن کی تعطیلات کے اختتامی روز واپسی کے سفر کا رش عروج پر رہا، اس روز ملک بھر میں سفری طلب میں اضافے اور سیاحتی سرگرمیوں میں تیزی کے باعث 2 کروڑ 41 لاکھ 50 ہزار سفری دوروں کی توقع ظاہر کی گئی ہے۔
چائنہ اسٹیٹ ریلوے گروپ کمپنی لمیٹڈ کے مطابق طلب میں اضافے سے نمٹنے کے لئے بدھ کے روز کل 2 ہزار 449 اضافی مسافر ٹرینیں چلانے کا شیڈول طے کیا گیا۔
ملک کے ریلوے نے منگل کے روز 2 کروڑ 16 لاکھ سفری دورے نمٹائے، اس طرح لگاتار تیسرے دن مسافروں کی تعداد 2 کروڑ سے زیادہ رہی۔
بیجنگ، گوانگ ژو، چھنگ دو، شی آن، ووہان، ہانگ ژو، چھونگ چھنگ اور شنگھائی روانگی اور آمد کے لحاظ سے مصروف ترین شہروں میں شامل تھے جب کہ بیجنگ-شنگھائی، ووہان-شنگھائی، ووہان-شین زین اور شی آن-چھنگ دو سمیت دیگر روٹس پر مسافروں کی تعداد خاص طور پر زیادہ رہی۔
ملک بھر کے ریلوے حکام نے لوگوں کی واپسی کے اس دباؤ میں سہولت فراہم کرنے کے لئے نہ صرف خدمات میں اضافہ کیا بلکہ رات بھر کی سرگرمیوں کو بھی وسعت دی کیونکہ 7 روزہ تعطیلات کے دوران چین کی بھرپور سیاحتی رونق دیکھی گئی جس میں کاؤنٹی کی سطح کے مقامات اور رات کے وقت خریداری اور کاروباری سرگرمیوں کا رجحان نمایاں رہا۔
بڑے شہروں سے دور پرسکون اور یادگار تجربات کے خواہشمند مسافروں میں کاؤنٹی کی سطح کے مقامات کی مقبولیت میں اضافہ ہوا۔
چین کے جنوبی صوبے ہائی نان کی ساحلی کاؤنٹی لنگ شوئی سے ملک کی شمالی سرحد پر موجود کاؤنٹی کی سطح کے شہر موحہ تک چھوٹی منزلیں منفرد مقامی تجربات کے ساتھ سیاحوں کو اپنی طرف متوجہ کر رہی ہیں۔
دریں اثنا بہت سے شہروں میں رات کے وقت کی خرید و فروخت عروج پر رہی جہاں ثقافتی مظاہروں، رات کی مارکیٹوں، روشنی کی نمائشوں اور کھانے کے میلوں نے سیاحوں کے قیام کو طول دیا اور چھٹیوں کے لمحات کو بھرپور بنایا۔