اسلام آباد (نیشنل ٹائمز)برطانوی وزیر مملکت برائے مشرق وسطیٰ، شمالی افریقہ، افغانستان و پاکستان اسٹیفن ڈاؤٹی نے ڈپٹی وزیراعظم و وزیر خارجہ اسحاق ڈار اور وفاقی وزیر قانون و انصاف و انسانی حقوق سینیٹر اعظم نذیر تارڑ سے الگ الگ ملاقاتیں کیں۔ ملاقاتوں میں پاک برطانیہ تعلقات، علاقائی و عالمی صورتحال، انسانی حقوق اور باہمی دلچسپی کے امور پر تبادلہ خیال کیا گیا۔اسحاق ڈار سے ملاقات میں دونوں ممالک نے دوطرفہ تعلقات مزید مضبوط  بنانے اور تجارت، سرمایہ کاری، تعلیم و سکیورٹی کے شعبوں میں تعاون بڑھانے پر اتفاق کیا۔ سیاسی مکالمہ جلد فعال بنانے کے اقدامات بھی زیر غور آئے ،اسحاق ڈار نے کہا کہ علاقائی و عالمی چیلنجز سے نمٹنے کے لئے مسلسل مذاکرات اور سفارت کاری ناگزیر ہے ۔اعظم نذیر تارڑ سے ملاقات میں انسانی حقوق، خواتین و بچوں کے تحفظ، انسانی سمگلنگ، کم عمری کی شادیوں، علاقائی امن و سلامتی اور سندھ طاس معاہدے پر گفتگو ہوئی۔ وفاقی وزیر نے بھارت کی جانب سے معاہدے کی معطلی کے پاکستان کی زراعت اور غذائی تحفظ پر ممکنہ اثرات سے آگاہ کیا۔ دونوں جانب نے باہمی تعاون اور رابطہ جاری رکھنے پر اتفاق کیا ، ملاقاتوں میں علاقائی امن و سلامتی اور سندھ طاس معاہدے سے متعلق امور زیر بحث آئے۔