حسن ابدال (نیشنل ٹائمز) وزیراعلیٰ پنجاب مریم نواز کے وژن اور متعلقہ حکام کی ہدایات پر محکمہ فوڈ اٹک نے ضلعی انتظامیہ کے ہمراہ کارروائی کرتے ہوئے خیبر پختونخوا سمگل کی جانے والی گندم اور آٹے کی بھاری کھیپ پکڑ لی۔

 کارروائی کے دوران 6 ٹرکوں سے مجموعی طور پر 64 ٹن آٹا اور 43 ٹن گندم برآمد کرکے گاڑیوں کو قبضے میں لے لیا گیا۔ محکمہ فوڈ کی ٹیموں نے جی ٹی روڈ حسن ابدال، خواجہ نگر اور ایم ون موٹروے پر خصوصی ناکہ بندی کی۔ چیکنگ کے دوران 6 مشکوک ٹرکوں کو روک کر تلاشی لی گئی جن کے پاس گندم اور آٹے کی ترسیل کے مطلوبہ اجازت نامے اور قانونی دستاویزات موجود نہیں تھیں۔ تلاشی کے دوران 64 ٹن آٹا اور 43 ٹن گندم برآمد ہوئی۔محکمہ فوڈ کے مطابق برآمد شدہ گندم اور آٹا سرکاری گوداموں میں منتقل کردیا گیا ہے جہاں سے اسے سرکاری نرخوں پر عوام کو فراہم کیا جائے گا۔