بیجنگ (شِنہوا) چین کی وزارت تجارت نے ہفتہ کو بتایا ہے کہ چین نے یورپی یونین (ای یو) سے درآمد کئے جانے والے پی نائٹروٹولوین کے خلاف اینٹی ڈمپنگ تحقیقات شروع کر دی ہیں۔
وزارت تجارت کے ترجمان نے میڈیا کے ایک سوال کے جواب میں بتایا کہ یہ تحقیقات مقامی صنعت کی درخواست پر شروع کی گئی ہیں۔
ترجمان کے مطابق درخواست گزاروں کی جانب سے پیش کئے گئے ابتدائی شواہد سے ظاہر ہوتا ہے کہ 2022 سے 2025 تک یورپی یونین سے پی نائٹروٹولوین کی درآمدات کی مقدار بلند سطح پر رہی جبکہ اس عرصے کے دوران اس کی قیمتوں میں مجموعی طور پر تقریباً 60 فیصد کمی ہوئی۔ ترجمان نے کہا کہ یورپی یونین سے کم قیمت پر ہونے والی ان درآمدات سے چین کی مقامی صنعت کی پیداوار اور کاروباری سرگرمیوں کو نقصان پہنچا۔
ترجمان نے کہا کہ درخواست چینی قوانین اور عالمی تجارتی تنظیم (ڈبلیو ٹی او) کے قواعد کے تحت کم قیمت درآمدات کی تحقیقات کے آغاز کی شرائط پر پورا اترتی ہے۔ انہوں نے مزید کہا کہ چین متعلقہ قوانین و ضوابط کے مطابق تحقیقات کرے گا اور تمام متعلقہ فریقوں کے حقوق کا مکمل تحفظ یقینی بنائے گا۔
وزارت کے مطابق پی نائٹروٹولوین جسے 4-نائٹروٹولوین بھی کہا جاتا ہے، بنیادی طور پر ایسے کیمیکلز کی تیاری میں استعمال ہوتا ہے جو رنگ سازی، روغن، کیڑے مار ادویات اور ادویات سازی کے شعبوں میں وسیع پیمانے پر استعمال ہوتے ہیں۔