سڈنی (شِنہوا) ماہرین آثار قدیمہ نے منشیات کے باقاعدہ استعمال کے ممکنہ طور پر قدیم ترین شواہد دریافت کئے ہیں جن کے مطابق ابتدائی دور کے انسانوں میں ’’چھالیہ‘‘ کا استعمال زراعت سے بھی ہزاروں سال یعنی تقریباً 25 ہزار سال قبل پایا جاتا تھا۔
آسٹریلیا کی گریفتھ یونیورسٹی کے ماہرین آثار قدیمہ کی قیادت میں کام کرنے والی ایک ٹیم کے جمعرات کو جاری بیان کے مطابق ماہرین کو ایسے شواہد ملے ہیں جن سے معلوم ہوتا ہے کہ انسان سابقہ اندازوں سے کہیں پہلے ذہنی کیفیت پر اثرات ڈالنے والی اشیاء استعمال کر رہے تھے۔
اس ٹیم نے انڈونیشیا کے ماہرین آثار قدیمہ کے ساتھ مل کر حیاتیاتی کیمیائی اور آثار قدیمہ کے شواہد یکجا کئے تاکہ چھالیہ کی قبل از تاریخ جڑوں کا سراغ لگایا جا سکے۔ چھالیہ دنیا کی مقبول ترین نشہ آور چیزوں میں سے ایک ہے اور ایشیا بحر الکاہل کے بیشتر حصے میں استعمال ہونے والا ایک قدیم نشہ ہے۔
سائنس ایڈوانسز میں شائع شدہ اس تحقیق میں انڈونیشیا کے جزیرے سولاویسی سے ابتدائی دور کے دو انسانوں کے انتہائی نایاب ڈھانچے دریافت ہونے کی اطلاع پیش کی گئی ہے۔ ان میں سے ایک کا تعلق 25 ہزار سے 16 ہزار سال پہلے کے دور سے ہے جبکہ دوسرا 7,600 سے 6,300 سال قبل کا ہے۔
محققین نے بتایا کہ دونوں شکاری اور خوراک جمع کرنے والے افراد کے دانتوں پر انتہائی غیر معمولی، گہرے اور گول شکل کے شگاف پائے گئے۔ محققین کے مطابق یہ ایک ایسی علامت ہے جس سے انہوں نے ثابت کیا کہ دانتوں پر یہ نشانات منشیات کے استعمال کے ایک پہلے نامعلوم طریقے، یعنی پوری سپاری کو باقاعدگی سے چوسنے کے باعث پیدا ہوئے تھے۔
ان کے مطابق حیاتیاتی کیمیائی تجزیے میں بھی ان انسانوں کے دانتوں کی بافتوں سے ایریکولین کی موجودگی کے اثرات ملے ہیں جو چھالیہ کے استعمال کا مضبوط ثبوت فراہم کرتے ہیں۔ انہوں نے مزید بتایا کہ تجربات سے معلوم ہوا ہے کہ ثابت چھالیہ چوسنے سے اتنی مقدار میں ایریکولین خارج ہو سکتی ہے جو جسمانی اثرات مرتب کرنے اور دماغی افعال تبدیل کرنے کے لئے کافی ہوتی ہے۔
اس سے قبل یہ سمجھا جاتا تھا کہ چھالیہ کا استعمال جدید پتھر کے دور یا کانسی کے دور یعنی تقریباً 3,500 سال پہلے شروع ہوا تھا۔
ان نتائج سے معلوم ہوتا ہے کہ دماغی کیفیت تبدیل کرنے والے مادوں کا باقاعدہ استعمال زراعت سے بھی ہزاروں سال پہلے شکاری برادریوں میں موجود تھا اور چھالیہ چوسنا منشیات کے استعمال کا اب تک کا سب سے قدیم ریکارڈ شدہ ثبوت ہو سکتا ہے۔