اسلام آباد، راولپنڈی(نیشنل ٹائمز)ملک بھر میں یوم فضائیہ قومی جوش و جذبے سے منایا گیا، 1965 کی پاک بھارت جنگ میں پاک فضائیہ کے شاہینوں  نے شجاعت، مہارت اور جانبازی کی لازوال مثالیں قائم کیں، پاکستان ایئر فورس نے ملک بھر کی تمام پی اے ایف بیسز پر7 ستمبر کو یوم شہدا کے طور پر مناتے ہوئے اپنے شہدا کی عظیم قربانیوں کو خراج عقیدت پیش کیا ۔ پاک فوج کے شعبہ تعلقات عامہ(آئی ایس پی آر )کے مطابق یوم شہدا کا آغاز 1965 اور 1971 کی جنگوں کے شہدا ، معرکہ حق کے بہادر شہدا اور پاکستان کے قیام سے لے کر اب تک فرض کی ادائیگی کے دوران اپنی جانوں کا نذرانہ پیش کرنے والے پاک فضائیہ کے تمام اہلکاروں کیلئے خصوصی دعا اور قرآن خوانی سے ہوا۔

پاک فضائیہ کے سربراہ ایئر چیف مارشل ظہیر احمد بابر سدھو اسلام آباد میں ایئر ہیڈکوارٹرز میں منعقدہ یوم شہدا کی تقریب کے مہمان خصوصی تھے ۔ایئر چیف مارشل نے کہا کہ ہمارے اسلاف کے بہادرانہ کارنامے محض تاریخ کے ابواب نہیں بلکہ ایک زندہ ورثہ ہیں جو موجودہ نسل پر ایک گہری ذمہ داری عائد کرتے ہیں۔ایئر چیف مارشل نے یادگار شہدا پر پھولوں کی چادر چڑھائی اور پاک فضائیہ کے بہادر شہدا کیلئے فاتحہ خوانی بھی کی۔صدر مملکت آصف علی زرداری نے اپنے پیغام میں کہا پاک فضائیہ کے شاہینوں نے بے مثال بہادری کا مظاہرہ کیا، پاک فضائیہ پاکستان کی خودمختاری اور فضائی حدود کے دفاع کیلئے ہر لمحہ مستعد ہے ۔وزیراعظم شہباز شریف نے کہا پاک فضائیہ نے ہمیشہ قوم کی پکار پر بے مثال جرأت و بہادری کیساتھ لبیک کہا۔وفاقی وزیر داخلہ محسن نقوی نے کہا پاک فضائیہ کی اعلیٰ پیشہ ورانہ مہارت اور صلاحیتوں پر پوری قوم کو فخر ہے ۔وزیراعلیٰ مریم نواز نے کہا یوم فضائیہ قومی اتحاد، غیر متزلزل عزم اور حب الوطنی کے جذبے کی علامت ہے ۔