بیجنگ (شِنہوا) چینی وزیر خارجہ وانگ یی نے کہا ہے کہ مشرق وسطیٰ میں نیا سکیورٹی نظام قائم کرنے کے لئے چینی صدر شی جن پھنگ کی چار نکاتی تجویز ایک بار پھر خطے میں طویل مدتی امن اور استحکام کے حصول کے لئے چینی حل پیش کرتی ہے۔
وانگ یی، جو کمیونسٹ پارٹی آف چائنہ کی مرکزی کمیٹی کے سیاسی بیورو کے رکن بھی ہیں، نے یہ بات صحافیوں کو بریفنگ دیتے ہوئے کہی۔ انہوں نے چینی صدر کے شنگھائی تعاون تنظیم (ایس سی او) کے بشکیک سربراہی اجلاس میں شرکت اور کرغزستان و مصر کے سرکاری دوروں کے اختتام کے بعد میڈیا سے گفتگو کی۔
شی جن پھنگ نے مصری صدر عبدالفتاح السیسی سے ملاقات کے دوران یہ تجویز پیش کی، جس میں اندرونی قوتوں کو متحرک کرنے، مربوط حکمت عملی کو آگے بڑھانے، ترقی کی بنیاد مضبوط بنانے اور بین الاقوامی تعاون کو فروغ دینے پر زور دیا گیا۔
وانگ یی نے کہا کہ عالمی مبصرین کے مطابق شی جن پھنگ کی یہ تجویز مشرق وسطیٰ کے سکیورٹی بحران کے حل کے لئے ایک قابل عمل راستہ فراہم کرتی ہے۔
وانگ یی کے مطابق دورے میں شی جن پھنگ نے مختلف ممالک کے رہنماؤں کے ساتھ عالمی معاملات اور اہم علاقائی و بین الاقوامی مسائل پر گہرائی سے تبادلہ خیال کیا، امن کے لئے آواز بلند کی اور انصاف کا ساتھ دیا۔
بشکیک سربراہی اجلاس کے موقع پر شی جن پھنگ نے روسی صدر ولادیمیر پوتن، ازبکستان کے صدر شوکت مرزایوف اور منگولیا کے صدر اوخنا خورلیسوخ سے الگ الگ ملاقاتیں بھی کیں۔
وانگ یی نے بتایا کہ شی جن پھنگ اور صدر پوتن نے چین اور روس کے درمیان جامع تزویراتی تعاون کو مزید گہرا کرنے، عالمی نظم و نسق میں اصلاحات آگے بڑھانے، کثیر قطبی دنیا کے فروغ اور عالمی امن، استحکام اور ترقی کے مشترکہ تحفظ پر اتفاق کیا۔
وانگ یی نے کہا کہ شی جن پھنگ کے سفارتی نظریے کی رہنمائی میں چین نے اہم علاقائی اور عالمی تنازعات کے حل کے لئے ایک منفرد چینی طرز عمل اختیار کرنے کی کوشش کی ہے۔ انہوں نے کہا کہ تنازعات چاہے کتنے ہی پیچیدہ ہوں یا کشیدگی کتنی ہی شدید ہو، چین ہمیشہ مضبوطی سے امن اور مذاکرات کے ساتھ اور تاریخ کے درست رخ پر کھڑا رہے گا۔