بیجنگ (شِنہوا) چین کے ریلوے نظام کے ذریعے رواں سال موسم گرما کے 62 روزہ سفری رش کے دوران تقریباً 95 کروڑ 40 لاکھ سفری دورے ہوئے جبکہ مال برداری کا نظام مستحکم اور محفوظ رہا۔
چائنہ سٹیٹ ریلوے گروپ کمپنی لمیٹڈ (چائنہ ریلوے) کے مطابق یکم جولائی سے 31 اگست تک ملک بھر کے ریلوے نیٹ ورک کے ذریعے 68 کروڑ ٹن سامان منتقل کیا گیا۔
کمپنی کے ایک عہدیدار نے بتایا کہ ریلوے آپریٹر نے موسم گرما کے لئے ٹرینوں کا خصوصی آپریشن شیڈول نافذ کرنے، تیسری سہ ماہی کے ٹائم ٹیبل کے ساتھ اسے ہم آہنگ کرنے اور نئی شروع کی گئی ریلوے لائنوں سے بھرپور استفادہ کرتے ہوئے ٹرانسپورٹ کی گنجائش میں اضافہ کیا۔
2026 کے موسم گرما کے دوران ملک کے ریلوے نیٹ ورک پر روزانہ اوسطاً 11 ہزار 623 مسافر ٹرینیں چلائی گئیں۔
موسم گرما میں خاندانی دوروں، مطالعاتی دوروں، ریڈ ٹورازم اور صحت و تفریحی سیاحت کی بڑھتی ہوئی طلب کو پورا کرنے کے لئے چائنہ ریلوے نے 699 سیاحتی ٹرینیں چلائیں جن میں 415 خصوصی سیاحتی ٹرینیں شامل تھیں۔
اس کے علاوہ مختلف تقریبات، نمائشوں اور فن کے مظاہروں کے لئے خصوصی طور پر تیار کردہ 351 ٹرینیں بھی چلائی گئیں جن میں موسیقی اور کھیلوں کے شائقین کے لئے مخصوص ٹرینیں بھی شامل تھیں۔ اس اقدام سے ان روٹس پر ثقافتی اور سیاحتی اخراجات کو فروغ ملا۔