جیو چھوان (شِنہوا) چین نے شمال مغربی علاقے میں واقع ڈونگ فینگ کمرشل سپیس انوویشن پائلٹ زون سے پلاس-1 وائی 1 کیریئر راکٹ کو کامیابی کے ساتھ خلا میں روانہ کر دیا۔
راکٹ نے بیجنگ کے وقت کے مطابق صبح 10 بجے اڑان بھری اور پوری پرواز کے دوران معمول کے مطابق کارکردگی کا مظاہرہ کیا جس کے نتیجے میں اس کا پے لوڈ مقررہ مدار میں پہنچا دیا گیا۔ تمام آزمائشی اہداف حاصل کر لئے گئے اور مشن مکمل طور پر کامیاب رہا۔
یہ مشن پلاس-1 کی پہلی پرواز تھی۔ یہ درمیانے درجے کا 2 حصوں پر مشتمل مائع ایندھن والا کیریئر راکٹ ہے جسے گلیکٹک انرجی نے خود تیار کیا ہے۔
راکٹ کی لمبائی 52 میٹر ہے جبکہ اس کے مرکزی حصے کا قطر 3.35 میٹر، اڑان کے وقت وزن تقریباً 283 ٹن اور اڑان کے وقت تھرسٹ 350 ٹن ہے۔ یہ زمین کے نچلے مدار میں 5 سے 7 ٹن تک وزن لے جا سکتا ہے۔
گلیکٹک انرجی کے ایک اعلیٰ عہدیدار نے کہا کہ ’’یہ راکٹ تجارتی سیٹلائٹ صارفین کو ایک موثر اور کم لاگت والی ’خلائی ایکسپریس‘ فراہم کرنے کے لئے تیار کیا گیا ہے۔‘‘
راکٹ کے مرکزی پروپلشن نظام میں کمپنی کے اپنے تیار کردہ سی کیو-50 مائع آکسیجن-کیروسین انجن استعمال کئے گئے ہیں جن میں سے 7 انجن پہلے حصے میں متوازی طور پر نصب ہیں۔ یہ ترتیب راکٹ کی واپسی اور دوبارہ استعمال کی ضروریات پوری کرنے کے ساتھ ساتھ خرابی کی صورت میں متبادل صلاحیت فراہم کرنے کے لئے تیار کی گئی ہے۔ تجربات سے ظاہر ہوا کہ یہ انجن اپنی مقررہ تھرسٹ کے 32 فیصد سے 105 فیصد تک تھرسٹ کو ایڈجسٹ کر سکتے ہیں۔
کمپنی کے مطابق راکٹ میں مربوط ساخت اور پروپلشن ڈیزائن، 2 مائع ایندھن پر مبنی معاون پروپلشن نظام اور کثیر جہتی ایروڈائنیمک بوجھ کم کرنے کی ٹیکنالوجی بھی شامل ہے۔ زیادہ لچکدار مشنز کے لیے اسے ایروز-2 بالائی مرحلے سے بھی لیس کیا جا سکتا ہے۔