مظفرآباد(نیشنل ٹائمز) آزاد جموں و کشمیر قانون ساز اسمبلی کے نئے سپیکر اور ڈپٹی سپیکر کا انتخاب آج ہوگا۔

آزاد کشمیر قانون ساز اسمبلی کا اجلاس سپیکر چودھری لطیف اکبر کی زیر صدارت منعقد ہوگا، جس میں نئے سپیکر اور ڈپٹی سپیکر کے انتخاب کا عمل مکمل کیا جائے گا۔

شیڈول کے مطابق کاغذات نامزدگی صبح 10 بجے سے 11 بجے تک جمع کرائے جا سکیں گے، کاغذات نامزدگی کی جانچ پڑتال صبح 11 بج کر 15 منٹ پر کی جائے گی۔

امیدواروں کی جانب سے کاغذات نامزدگی واپس لینے کا آخری وقت صبح 11 بج کر 45 منٹ مقرر کیا گیا ہے، کاغذات واپس لینے کا وقت ختم ہونے کے بعد امیدواروں کی حتمی فہرست دوپہر 12 بجے جاری کی جائے گی۔

شیڈول کے مطابق آزاد کشمیر اسمبلی کے سپیکر کا انتخاب دوپہر 2 بجے ہوگا جبکہ ڈپٹی سپیکر کے لئے ووٹنگ 3 بجے ہوگی، سپیکر اور ڈپٹی سپیکر کا حلف بھی آج ہی ہوگا۔

ذرائع کا کہنا ہے کہ مسلم لیگ (ن) نے طارق فاروق جبکہ پیپلزپارٹی نے قاسم مجید کو سپیکر کیلئے نامزد کیا ہے۔