لاہور(نیشنل ٹائمز)وزیراعلیٰ مریم نواز سے ضلع اٹک سے تعلق رکھنے والے ارکان صوبائی اسمبلی نے ملاقات کی، جس میں  ضلع کی عوامی ضروریات، جاری ترقیاتی منصوبوں اور مستقبل کے منصوبوں پر تفصیلی تبادلہ خیال کیا گیا۔ ارکان اسمبلی نے آزاد جموں و کشمیر میں کامیابی پر وزیراعلیٰ کو مبارکباد بھی دی۔ارکان صوبائی اسمبلی نے اٹک اور گردونواح میں الیکٹروبس سروس کے آغاز پر مریم نواز شریف کو خراج تحسین پیش کرتے ہوئے کہا کہ پی او ایف سنجوال تا حضرو اور گورنمنٹ کالج آف ٹیکنالوجی ڈھوک فتح سے اٹک خورد تک الیکٹروبس سروس جاری ہے ۔ارکان اسمبلی نے وزیراعلیٰ کو بتایا کہ اٹک اور گردونواح کے لیے الیکٹروبس فراہم کیے جانے پر شہریوں میں خوشگوار ردعمل پایا جاتا ہے ۔ انہوں نے کہا کہ خواتین، طلبہ اور بزرگوں کے لیے مفت سفری سہولت کسی نعمت سے کم نہیں۔

ارکان اسمبلی نے کہا کہ مثالی گاؤں پراجیکٹ کے تحت دیہات کی اپ گریڈیشن انقلابی اقدام ہے ، جبکہ پنجاب کی ترقی اور تاریخی منصوبے دوسرے صوبوں کے لیے بھی مثال بن رہے ہیں۔وزیراعلیٰ مریم نوازنے کہا کہ ستھرا پنجاب پروگرام کی طرز پر صاف پانی پراجیکٹ بھی حکومت کی ترجیحات میں شامل ہے ۔ صفائی ستھرائی کے بعد پورے صوبے کے تمام شہروں میں شہریوں کو پینے کا صاف پانی فراہم کرنا ان کا عزم ہے ۔مریم نواز نے کہا کہ پاکستان مسلم لیگ (ن) نے ہی ملک کو ایٹمی طاقت بنایا اور موٹرویز کا جال بچھایا۔ پنجاب ڈویلپمنٹ پروگرام کے تحت صوبے بھر میں نکاسی آب، سیوریج سسٹم اور سڑکوں کے میگا پراجیکٹس شروع کیے گئے ہیں۔دریں اثنا، وزیراعلیٰ پنجاب مریم نواز شریف نے خاران میں دہشتگردوں کے خلاف کامیاب آپریشن پر اظہار تشکر کرتے ہوئے کہا کہ آپریشن ‘‘ردالفتنہ 3’’ کے دوران بروقت کارروائی کرکے سات دہشتگردوں کو ہلاک کرنے پر سکیورٹی فورسز کو خراج تحسین پیش کرتے ہیں۔