اسلام آباد (نیشنل ٹائمز) حج 2027 کے لیے سرکاری حج اسکیم کی درخواستوں اور اخراجات کی وصولی کے طریقہ کار کو حتمی شکل دے دی گئی ہے، درخواستوں کی وصولی اگست کے تیسرے ہفتے سے شروع ہونے کا امکان ہے۔

ذرائع وزارتِ مذہبی امور کے مطابق بیرونِ ملک مقیم پاکستانی بھی سرکاری حج اسکیم کے تحت درخواستیں جمع کرا سکیں گے، جبکہ حج اخراجات دو مساوی اقساط میں وصول کیے جائیں گے۔

ذرائع کا کہنا ہے کہ عازمین حج کو پہلی قسط میں مجموعی اخراجات کا نصف ادا کرنا ہوگا، جبکہ باقی رقم دوسری قسط میں وصول کی جائے گی۔ حج کوٹہ مکمل ہونے پر مزید درخواستوں کی وصولی روک دی جائے گی۔

ذرائع کے مطابق حج 2027 کے لیے مجموعی کوٹہ ایک لاکھ 79 ہزار 210 مقرر کیا گیا ہے، جس میں سرکاری حج اسکیم کے لیے 60 فیصد جبکہ نجی حج اسکیم کے لیے 40 فیصد کوٹہ مختص کیا گیا ہے۔