ویانا (شِنہوا) اوپیک پلس کے 7 رکن ممالک نے ستمبر کے لئے تیل کی پیداوار میں اگست کی نسبت ایک لاکھ 88 ہزار بیرل یومیہ اضافہ کرنے پر اتفاق کیا ہے۔
اس فیصلے کا اعلان اوپیک پلس کے ورچوئل اجلاس کے بعد جاری اعلامیے میں کیا گیا جس میں سعودی عرب، روس، عراق، کویت، قازقستان، الجزائر اور عمان نے شرکت کی اور عالمی منڈی کی صورتحال سمیت مستقبل کے خدشات و توقعات کا جائزہ لیا۔
اوپیک پلس ممالک پٹرولیم مصنوعات برآمد کرنے والے ممالک کی تنظیم (اوپیک) کے اراکین اور اس کے اتحادیوں پر مشتمل ہیں۔
اعلامیے کے مطابق تیل کی منڈی میں استحکام برقرار رکھنے کے اپنے مشترکہ عزم کے تحت ساتوں شریک ممالک نے اپریل 2023 میں کی گئی رضاکارانہ پیداواری کٹوتیوں کو بتدریج ختم کرتے ہوئے پیداوار بڑھانے کا فیصلہ کیا ہے۔ روزانہ 16 لاکھ 50 ہزار بیرل کی اس رضاکارانہ کٹوتی کا پہلی بار اعلان اپریل 2023 میں کیا گیا تھا، بعد ازاں اس مدت میں 2026 کے اختتام تک توسیع کی گئی تھی۔
اتوار کے روز کیا گیا یہ فیصلہ اوپیک پلس کی جانب سے اپنی پیداوار بڑھانے کا مسلسل چھٹا مہینہ ہے۔
اعلامیے کے مطابق یہ ساتوں ممالک منڈی کی بدلتی ہوئی صورتحال کے حساب سے اپنی پیداوار میں لچکدار طریقے سے ترامیم کریں گے اور اکتوبر کی پیداواری سطح کا فیصلہ کرنے کے لئے 6 ستمبر کو اجلاس منعقد کریں گے۔