بیجنگ (شِنہوا) چین نے ہوآنگ یان داؤ قومی قدرتی تحفظ گاہ کے لیے انتظامی اقدامات جاری کیے ہیں جو ہوآنگ یان داؤ کے قدرتی ماحولیاتی نظام کے تنوع، استحکام اور پائیداری کو تحفظ دینے کی سمت ایک اہم قدم ہے۔
ان قواعد کے تحت خلاف ورزیوں کی قانون کے مطابق فوری تفتیش اور کارروائی کے لیے باقاعدہ گشت کا ایک نظام قائم کیا جائے گا اور خلاف ورزی کرنے والوں کو متعلقہ قوانین و ضوابط کے تحت جوابدہ ٹھہرایا جائے گا۔
یہ قواعد وزارتِ قدرتی وسائل، قومی جنگلات و چراگاہ انتظامیہ، چائنہ کوسٹ گارڈ اور ہائی نان کی صوبائی حکومت کی جانب سے مشترکہ طور پر جاری کیے گئے جن میں واضح ذمہ داریاں تفویض کی گئی ہیں اور اہم امور سے نمٹنے کے لیے ایک باہمی ربط و ضبط کا نظام بنایا گیا ہے۔
16 نکات پر مشتمل یہ اقدامات انتظامی طریقہ کار، تحفظ کی تدابیر اور قانونی ذمہ داریوں پر مرکوز ہیں جو اس تحفظ گاہ کے لیے ایک جامع نگران لائحہ عمل فراہم کرتے ہیں۔
ان قواعد کے مطابق یہ قدرتی تحفظ کا علاقہ ’مکمل تحفظ‘ کے تحت ہو گا۔ پیشگی منظوری کے بغیر ماہی گیری، کان کنی، اور مرجان، مرجانی چٹانوں یا دیوقامت سیپیاں نکالنے سمیت کسی بھی قسم کی سرگرمی پر پابندی ہوگی جو نایاب بحری انواع اور قدرتی ماحولیاتی نظام کو نقصان پہنچاتی ہے۔
کوئی بھی فرد یا تنظیم قوانین و ضوابط میں دیے گئے استثنیٰ یا تحفظ اور انتظامی مقاصد کے لیے منظم کی جانے والی سرگرمیوں کے علاوہ اس تحفظ گاہ میں داخل نہیں ہو سکتی۔
چین کے ژونگ شا جزائر میں واقع جزیرہ ہوآنگ یان مرجانی چٹانوں کے ایک منفرد ماحولیاتی نظام اور مخصوص جغرافیائی ساخت کا حامل ہے۔ یہ علاقہ متعدد نایاب اور معدومیت کے خطرے سے دوچار انواع کا مسکن ہے جو اسے اعلیٰ حیاتیاتی تنوع اور نایاب انواع کا اہم مرکز بناتا ہے۔
چین نے ستمبر 2025 میں باقاعدہ طور پر ہوآنگ یان داؤ قومی قدرتی تحفظ گاہ قائم کرنے کی منظوری دی تھی۔ چین کے جنوبی صوبہ ہائی نان کے شہر سانشا کے زیرِ انتظام یہ تحفظ گاہ 3,523.67 ہیکٹر رقبے پر محیط ہے۔