ماسکو(شِنہوا)روسی وزارت دفاع نے کہا ہےکہ روسی افواج نے رات کے وقت کیف میں ڈرون تیار کرنے والی تنصیبات کو نشانہ بنایا۔
وزارت نے اتوار کے روز سوشل میڈیا پر جاری ایک بیان میں کہاہے کہ یہ حملے زمین اور فضا سے داغے جانے والے انتہائی درست نشانہ بنانے والےہتھیاروں کے ذریعے کیے گئے، جن کا ہدف وہ فوجی صنعتی مراکز تھے جو بغیر پائلٹ اڑنے والی گاڑیوں (ڈرون) کی تیاری میں شامل تھے۔
بیان کے مطابق، نشانہ بنائے گئے مراکز میں سے ایک اسمارٹ انٹیلی جنٹ سسٹمز تھا، جو مختلف اقسام کے ڈرون اور ان کے متعلقہ پرزہ جات تیار کرتا ہے، جن میں طیاروں کے ڈھانچے، الیکٹرانک نظام، نیویگیشن آلات، آپٹیکل آلات اور بیٹریاں شامل ہیں۔
وزارتِ دفاع نے کہا کہ روسی افواج نے یوکرین کے علاقے اوڈیسا میں واقع چورنومورسک بندرگاہ کے بنیادی ڈھانچے کو بھی نشانہ بنایا، جن میں ایندھن اور لبریکنٹس کے ذخیرہ کرنے کی تنصیبات شامل تھیں، جو یوکرینی مسلح افواج کی مدد کے لیے استعمال کی جا رہی تھیں۔