ایتامار،راملہ(نیشنل ٹائمز) مغربی کنارے میں دو الگ واقعات کے دوران تین فلسطینی شہید جبکہ ایک اسرائیلی زخمی ہو گیا۔

 اسرائیلی فوج کے مطابق ایتامار بستی کے قریب مبینہ چاقو حملے میں دو فلسطینی شہید ہوئے ، ایک اسرائیلی شہری سینے پر وار سے زخمی ہوا۔ فلسطینی حکام نے الزام عائد کیا کہ مقامی باشندے آگ بجھانے گئے تو اسرائیلی آبادکاروں نے حملہ کیا۔ فوج نے بتایا کہ ایک فلسطینی نے جینم کے قریب فوجی چوکی پر حملہ کیا جس کے بعد اسے شہید کر دیا گیا۔ادھر اسرائیلی بینکوں نے فلسطینی بینکوں کو آئندہ چند ہفتوں میں اہم بینکاری سہولیات بند کرنے کا نوٹس دے دیا، جس سے مغربی کنارے میں شدید معاشی بحران کے خدشات بڑھ گئے ہیں۔ فلسطینی مانیٹری اتھارٹی کے گورنر یحیی شنار کے مطابق ان خدمات کی بندش سے اسرائیل سے بجلی، پانی، ایندھن اور خوراک کی درآمدات کے ساتھ فلسطینی مزدوروں کی تنخواہوں کی ترسیل بھی متاثر ہوگی۔ انہوں نے کہا کہ بینک ہاپوعلیم سے منسلک پانچ فلسطینی بینک یکم اکتوبر جبکہ ڈسکاؤنٹ بینک سے وابستہ بینک یکم ستمبر سے سہولت سے محروم ہو جائیں گے ۔ دونوں اسرائیلی بینک سالانہ 51 ارب شیکل مالیت کے فلسطینی مالیاتی لین دین سنبھالتے ہیں۔ اسرائیلی قومی سلامتی کے وزیر ایتمار بن گویر نے جمعرات کو 2ہزار یہودیوں کے ہمراہ مسجد اقصیٰ کے احاطے میں زبردستی داخل ہو کر وہاں عبادت کی، اس موقع پر نمازیوں کو مسجد میں داخل ہونے سے روک دیا۔