کاراوانگ، انڈونیشیا (شِنہوا) چین کی معروف مشینری کمپنی لیو گونگ نے انڈونیشیا کے مغربی جاوا میں اپنے ماحول دوست اور جدید صنعتی پارک کا سنگِ بنیاد رکھا۔ تقریب میں 300 سے زائد افراد نے شرکت کی، جن میں سرکاری حکام، صنعتی شعبے کے شراکت دار اور صارفین شامل تھے۔
مغربی جاوا کے گورنر دیدی مولیادی نے اپنے خطاب میں کہا کہ یہ منصوبہ صوبے کی صنعتی ترقی اور پیداواری شعبے کو نئی رفتار دے گا۔ انہوں نے اس عزم کا اعادہ کیا کہ صوبائی حکومت صنعتی پارک کی تعمیر میں بھرپور تعاون کرے گی، کاروبار کے لئے سازگار ماحول فراہم کرے گی اور دونوں فریقوں کے درمیان باہمی مفاد پر مبنی تعاون کو فروغ دے گی۔
گوانگ شی لیو گونگ گروپ کمپنی لمیٹڈ اور گوانگ شی لیو گونگ مشینری کمپنی لمیٹڈ کے چیئرمین ژینگ جن نے کہا کہ یہ صنعتی پارک انڈونیشیا کی منڈی سے لیو گونگ کے طویل المدتی عزم کا عملی مظہر ہے۔
انہوں نے کہا کہ لیو گونگ انڈونیشیا اور دیگر آسیان ممالک میں اپنے شراکت داروں کے ساتھ تعاون کو مزید مضبوط بنائے گا، وسیع تعاون کے ذریعے جدت کو فروغ دے گا اور صنعتی شراکت داروں کے ساتھ مل کر پائیدار صنعتی ترقی اور خطے میں ماحول دوست تبدیلی کی حمایت کرے گا۔
اس موقع پر گوانگ شی لیو گونگ مشینری کمپنی لمیٹڈ کے نائب چیئرمین اور صدر لوو گوبنگ نے کہا کہ یہ صنعتی پارک صرف ایک پیداواری کارخانہ نہیں بلکہ ایک جدید اور ماحول دوست صنعتی پلیٹ فارم ہے، جہاں پیداوار، تحقیق و ترقی، افرادی قوت کی تربیت اور صنعتی تعاون کو یکجا کیا گیا ہے۔
انہوں نے کہا کہ انڈونیشیا میں مصنوعات کے استعمال سے متعلق تحقیق و ترقی کا مرکز قائم کرے گا اور یونیورسٹی آف گاجہ مادا کے ساتھ شراکت داری کرے گا تاکہ ٹیکنالوجی کی منتقلی کو فروغ دیا جا سکے اور مقامی ہنرمند افراد تیار کئے جا سکیں، جس سے انڈونیشیا کی تعمیراتی آلات کی صنعت کی پائیدار ترقی میں نئی توانائی شامل ہوگی۔
اپنی مقامی حکمت عملی کے تحت لیو گونگ نے 2023 میں چین۔انڈونیشیا تعلیمی تعاون پروگرام میں شامل ہونے کے بعد اب تک 900 سے زائد مقامی طلبہ کو تربیت دی ہے۔ اس وقت 30 انڈونیشیائی تربیت یافتگان کا نیا گروپ چین میں لیو گونگ کے صدر دفتر میں پیشہ ورانہ تربیت حاصل کر رہا ہے اور تعلیم مکمل کرنے کے بعد انڈونیشیا میں کمپنی کے پیداواری مرکز میں خدمات انجام دے گا۔
یہ صنعتی پارک 2027 کی پہلی ششماہی میں کام شروع کرے گا اور انڈونیشیا کا پہلا ایسا پیداواری مرکز ہوگا جو بھاری برقی مشینری کی تیاری کے لئے مخصوص ہوگا۔ اس سے انڈونیشیا کو ایشیا بحرالکاہل خطے میں لیو گونگ کے پیداواری مرکز کی حیثیت حاصل کرنے میں مدد ملے گی۔
لیو گونگ نے 2002 میں عالمی توسیع کی اپنی حکمت عملی شروع کرنے کے بعد دنیا بھر میں 40 سے زائد بیرون ملک ذیلی کمپنیاں، 20 سے زیادہ پیداواری کارخانے اور عالمی تحقیق و ترقی کے 17 مراکز قائم کئے ہیں جبکہ اس کی مصنوعات اور خدمات 180 سے زائد ممالک اور خطوں میں فراہم کی جا رہی ہیں۔