فری ٹاؤن(شِنہوا) سیرالیون میں چینی طبی ٹیم کے 27ویں دستے نے روایتی چینی طب(ٹی سی ایم) پر مبنی نرسنگ تربیتی پروگرام کا آغاز کیا ہے، جس میں ڈیجیٹل لیکچرز اور عملی طبی تربیت کو یکجا کیا گیا ہے تاکہ مقامی علاج معالجے کی صلاحیت کو مزید مضبوط بنایا جا سکے۔
ہفتے کے روز دارالحکومت فری ٹاؤن میں واقع سیرالیون-چائنہ فرینڈشپ ہسپتال کے ٹیلی میڈیسن سینٹر میں منعقدہ افتتاحی سیشن میں 40 سے زائد نرسوں نے شرکت کی۔
چین-سیرالیون نرسنگ ٹریننگ سینٹر کے تحت منعقد کیے گئے اس پروگرام میں چین کے صوبہ ہونان کے طبی ماہرین کے آن لائن لیکچرز کو چینی طبی ٹیم کے ارکان کی جانب سے موقع پر دی جانے والی عملی تربیت کے ساتھ شامل کیا گیا ہے۔
تربیتی پروگرام میں 4 جہتی تدریسی ماڈل متعارف کرایا گیا ہے جس میں نظریاتی تعلیم، عملی مشقیں، سوال و جواب کے سیشنز اور براہ راست طبی معائنوں کے دورے شامل ہیں۔
سیرالیون میں گردن، کندھوں اور جوڑوں کے دائمی درد کے بڑھتے ہوئے مسائل سے نمٹنے کے لیے چینی طبی ٹیم کے ایک ماہر نے فو کی سب کیوٹینیئس نیڈلنگ(ایف ایس این) تھراپی کا مظاہرہ کیا جو ایک جدید آکو پنکچر تکنیک ہے۔ شرکا کی بہتر آگاہی کے لیے اسے آسان انگریزی میں پیش کیا گیا۔
دیگر عملی تربیتی سیشنز میں گوا شا، موونگ کپنگ، موکسی بسشن اور مساج شامل تھے جبکہ تربیت سازوں نے معیاری طریقہ کار اور مریضوں کی حفاظت پر زور دیا۔
سیرالیون-چائنہ فرینڈشپ ہسپتال کی رجسٹرڈ نرس زینب بانگورا نے کہا ’’یہ کورس منظم اور عملی معلومات فراہم کرتا ہے جو ہماری روزمرہ طبی ضروریات سے ہم آہنگ ہے اور یہاں درد کے علاج کی خدمات میں موجود ایک واضح کمی کو پورا کرتا ہے۔‘‘
چینی طبی ٹیم نے کہا کہ وہ ٹیلی میڈیسن سینٹر کے ذریعے دو لسانی روایتی چینی طب کی ورکشاپس کا سلسلہ جاری رکھے گی تاکہ نرسنگ کے شعبے میں پائیدار صلاحیت سازی کو فروغ دیا جا سکے اور معیاری درد کے علاج کی سہولیات کو مزید وسعت دی جا سکے۔