رام اللہ(نیشنل ٹائمز)مقبوضہ مغربی کنارے کے گاؤں التوانی میں اسرائیلی آبادکاروں نے ایکمسجد کو آگ لگا دی جبکہ دو گھروں اور ایک ڈیری فیکٹری کو بھی نذر آتش کر دیا۔ فلسطینی حکام کے مطابق نقاب پوش آبادکاروں نے مسجد پر حملے کے دوران عبرانی زبان میں نعرے بھی دیواروں پر تحریر کیے ۔

مقامی افراد نے فوری کارروائی کرتے ہوئے آگ پر قابو پالیا، جس سے بڑا جانی نقصان ٹل گیا۔ اسرائیلی پولیس نے واقعے کی تصدیق کرتے ہوئے کہا ہے کہ حملے کی تحقیقات جاری ہیں۔ فلسطینی وزارت مذہبی امور نے اس واقعے کو دہشت گردی قرار دیتے ہوئے اسرائیلی حکومت پر آبادکاروں کی سرپرستی کا الزام عائد کیا۔ اقوام متحدہ کے مطابق غزہ جنگ کے آغاز کے بعد مقبوضہ مغربی کنارے میں فلسطینیوں پر آبادکاروں کے حملوں میں غیر معمولی اضافہ دیکھنے میں آیا ہے ۔