اقوام متحدہ (شِنہوا) گلوبل ڈیویلپمنٹ انیشی ایٹو (جی ڈی آئی) کے گروپ آف فرینڈز نے عالمی برادری سے مطالبہ کیا ہے کہ وہ بین الاقوامی ترقیاتی تعاون میں اقوام متحدہ کے مرکزی رابطہ کاری کا کردار برقرار رکھے اور جامع و متوازن ترقیاتی شراکت داریوں کو فروغ دے۔
اقوام متحدہ میں چین کے مستقل مشن کے ناظم الامور سن لی نے اقوام متحدہ کے اعلیٰ سطح کے سیاسی فورم برائے پائیدار ترقی کے عام مباحثے کے دوران گروپ کی جانب سے مشترکہ بیان دیتے ہوئے کہا ہے کہ عالمی برادری کو بڑھتے ہوئے چیلنجز کا سامنا ہے جن میں ترقیاتی وسائل کی کمی اور ترقی کی خلیج میں اضافہ اہم ہیں۔
گروپ نے پائیدار ترقی کے فروغ کے لئے عالمی سطح پر بھرپور اتفاق رائے، وسائل کی بہتر فراہمی، عملی اقدامات اور عوام دوست نقطہ نظر اپنانے پر زور دیا اور اقوام متحدہ کے ترقیاتی نظام و بین الاقوامی مالیاتی انتظام مزید موثر بنانے کے لئے اصلاحات کا مطالبہ بھی کیا جس میں عالمی بینک کے شیئر ہولڈنگ کا جائزہ اور بین الاقوامی مالیاتی فنڈ کے کوٹے کی تنظیم نو میں پیش رفت شامل ہے۔
بیان میں تمام متعلقہ فریقوں سے وسائل کی فراہمی، ترقیاتی سرمایہ کاری کے ذرائع کو وسعت دینے، ترقی پذیر ممالک کا مالیاتی بنیادی ڈھانچہ مضبوط بنانے، مالیاتی گنجائش میں اضافہ اور مالی معاونت بہتر بنانے میں مدد کرنے کا مطالبہ بھی کیا گیا ہے۔
مشترکہ بیان میں کہا گیا ہے کہ جی ڈی آئی کا گروپ آف فرینڈز پالیسی مکالمے کو فروغ دینے، ترقیاتی تجربات کے تبادلے اور عملی تعاون بڑھانے کے لئے پرعزم ہے۔ گروپ نے مزید ممالک کو دعوت دی ہے کہ وہ 2030 تک پائیدار ترقی کے اہداف کے حصول کے لئے کوششوں میں شامل ہوں۔