بیجنگ (شِنہوا) چینی صدر شی جن پھنگ نے بیجنگ میں بیلاروس کے صدر الیگزینڈر لوکاشینکو سے ملاقات کی۔
شی نے زور دیا کہ چین اور بیلاروس کو تزویراتی روابط برقرار رکھنے چاہئیں، اعلیٰ سطح پر استوار دوطرفہ تعلقات کی مسلسل ترقی کو فروغ دینا چاہیے تاکہ دونوں ممالک کے عوام بہتر طور پر مستفید ہو سکیں۔
چینی صدر نے کہا کہ چین بیلاروس کی قومی خودمختاری، آزادی اور علاقائی سالمیت کے تحفظ اور اس کے اپنے قومی حالات کے مطابق ترقی کی راہ پر گامزن رہنے کی حمایت کرتا ہے۔ انہوں نے بیلاروس کی ترقی کے لئے اپنی بساط کے مطابق امداد جاری رکھنے کی چین کی خواہش کا بھی اظہار کیا۔
صدر شی نے مزید کہا کہ دونوں ممالک کو بیلٹ اینڈ روڈ تعاون آگے بڑھانے کے لئے مختلف شعبوں سے وسائل بروئے کار لانے چاہئیں اور اس بحرانوں سے بھرپور دنیا میں ایک مستحکم قوت کے طور پر کردار ادا کرنے کے لئے کثیر الجہتی فورمز پر ہم آہنگی اور تعاون بڑھانا چاہیے۔