بیجنگ (شِنہوا) چین کی وزارت تجارت نے امریکہ پر زور دیا ہے کہ وہ چینی فوج سے منسلک کمپنیوں کی اپنی نام نہاد فہرست میں مزید چینی کمپنیوں کو شامل کرنے کا عمل فوری طور پر بند کرے اور واضح کیا ہے کہ چین اس کے ردعمل میں جوابی اقدامات اٹھانے پر مجبور ہوگا۔
وزارت تجارت کے ترجمان حہ یادونگ نے ایک معمول کی پریس کانفرنس کے دوران کہا کہ امریکہ کے اس اقدام نے چینی کمپنیوں کے جائز حقوق اور مفادات کو شدید نقصان پہنچایا ہےجس کے باعث چین کے لئے ردعمل دینا ضروری ہو گیا ہے۔
انہوں نے کہا کہ چین کی قومی سلامتی اور مفادات کے تحفظ اور عدم پھیلاؤسمیت بین الاقوامی ذمہ داریوں کو پورا کرنے کے لئے 22 جون کو چین کے سرکاری محکموں نے ایوی اوکس انکارپوریشن سمیت 10 امریکی اداروں کو برآمدی کنٹرول کی فہرست میں شامل کرنے کے اقدامات کا اعلان کیا۔ اس کے علاوہ 46 نامزد امریکی کمپنیوں کی تیار کردہ مصنوعات کو سرکاری خریداری میں شامل کرنے پر پابندی عائد کرنے کے اقدامات بھی کئے گئے۔
حہ یادونگ نے مزید کہا کہ نشانہ بنائی گئی تمام امریکی کمپنیاں فوجی شعبے سے وابستہ ہیں۔ انہوں نے امریکہ پر زور دیا کہ وہ چین کے ساتھ مل کر باہمی تعلقات میں تعمیری تعاون اور اسٹریٹجک استحکام کو برقرار رکھنے اور فروغ دینے کے لئے کام کرے۔