بیجنگ (شِنہوا) چینی مین لینڈ کے ایک ترجمان نے کہا ہے کہ ڈیموکریٹک پروگریسو پارٹی (ڈی پی پی) کے حکام علاقائی امن اور استحکام کو نقصان پہنچانے والے شرپسند عناصر ہیں کیونکہ وہ مسلسل ’’تائیوان کی آزادی‘‘ کے علیحدگی پسند موقف پر قائم ہیں۔
چین کی ریاستی کونسل کے تائیوان امور دفتر کے ترجمان ژانگ ہان نے کہا کہ بیرونی قوتوں پر انحصار کرتے ہوئے علیحدگی حاصل کرنے کی کوشش اور فوجی طاقت میں اضافہ کرنا آبنائے تائیوان کے دونوں جانب کشیدگی اور عدم استحکام کی بنیادی وجہ ہے۔
ژانگ نے میڈیا سے گفتگو کرتے ہوئے کہا کہ صرف اسی صورت میں آبنائے تائیوان کے دونوں جانب مشاورت اور مذاکرات دوبارہ شروع ہو سکتے ہیں اور باہمی تعلقات پرامن ترقی کی درست راہ پر واپس آ سکتے ہیں، جب ڈی پی پی کے حکام 1992 کے اتفاق رائے کو تسلیم کریں جو ’’ایک چین‘‘ کے اصول کی عکاسی کرتا ہے اور ’’تائیوان کی آزادی‘‘ سے متعلق تمام علیحدگی پسند سرگرمیاں بند کریں۔
ژانگ نے زور دیا کہ مین لینڈ انتہائی خلوص اور بھرپور کوششوں کے ساتھ پرامن اتحاد کے لئے کوشاں رہنے پر آمادہ ہے تاہم وہ کبھی بھی طاقت کے استعمال سے دستبردار ہونے کا وعدہ نہیں کرے گی اور نہ ہی ’’تائیوان کی آزادی‘‘ کی کسی بھی شکل میں علیحدگی پسند سرگرمیوں کے لئے کوئی گنجائش چھوڑے گی۔