وینتیان (شِنہوا) 22 جون کو مقامی وقت کے مطابق صبح آٹھ بج کر 25منٹ پر نئی تنظیم نو کے بعد عام رفتار کی مسافر ٹرین کے-12، جس کے ساتھ ایک اضافی سامان بردار بوگی بھی منسلک تھی، لاؤس کے وینتیان سٹیشن سے روانہ ہوئی۔ یہ چین-لاؤس ریلوے کے لاؤ سیکشن پر سامان اور پارسل کی ترسیل کے لئے سامان بردار بوگی کے باقاعدہ آپریشن کا پہلا موقع ہے۔
یہ اقدام اس بات کی علامت ہے کہ اس سیکشن نے اب باقاعدہ طور پر “مسافر اور مال برداری کے مشترکہ نظام” سے آگے بڑھ کر کام شروع کر دیا ہے، جس سے ٹرانسپورٹ کی کارکردگی اور سروس کے معیار میں مجموعی بہتری آئی ہے۔
ریلوے کے لاؤ سیکشن کو چلانے والی لاؤس-چین ریلوے کمپنی لمیٹڈ (ایل سی آر سی) کے مطابق اس حصے پر سامان اور پارسل کی ترسیل پہلے زیادہ تر عام رفتار کی مسافر ٹرینوں کے-11 اور کے-12 میں خالی نشستوں پر رکھ کی جاتی تھی۔ یہ طریقہ بڑھتی ہوئی طلب کو پورا کرنے میں ناکام رہا اور اس سے مسافروں پر بھی منفی اثر پڑا۔
اس مسئلے کو حل کرنے کے لئے ایل سی آر سی نے باقاعدہ استعمال کے لئے ایک خصوصی سامان بردار بوگی متعارف کرائی جس سے لاؤس میں ریلوے کے ذریعے سامان اور پارسل ترسیل کی صلاحیت دوگنا سے بھی زیادہ ہو گئی۔
سامان اور پارسل کی نقل و حمل کی نئی شروع کی گئی سروس لاؤ سیکشن کے اہم سٹیشنوں کا احاطہ کرے گی۔ آپریشن کے دوران ایل سی آر سی ریلوے کے سامان اور پارسل نقل و حمل کے ضوابط کے مطابق پورے عمل کی نگرانی کرے گی۔