اسلام آباد (نیشنل ٹائمز) وفاقی حکومت نے بجٹ 2026-27 میں سوشل میڈیا انفلونسرز، یوٹیوبرز اور دیگر ڈیجیٹل کانٹینٹ کریئیٹرز کی آمدن پر ٹیکس عائد کرنے کی تجویز پیش کردی ہے۔

فنانس بل کے مطابق سوشل میڈیا پلیٹ فارمز سے حاصل ہونے والی آمدن پر 5 فیصد ودہولڈنگ ٹیکس کٹوتی کی جائے گی۔ یہ ٹیکس اس وقت وصول کیا جائے گا جب متعلقہ شخص کے اکاؤنٹ میں رقم منتقل ہوگی۔

بجٹ دستاویزات کے مطابق فعال ٹیکس دہندگان کی فہرست میں شامل رہائشی افراد کی سوشل میڈیا آمدن سے 5 فیصد ٹیکس کاٹا جائے گا، جبکہ غیر رہائشی افراد کے اکاؤنٹس میں منتقل ہونے والی رقوم پر بھی اسی شرح سے ودہولڈنگ ٹیکس عائد ہوگا۔

فنانس بل میں سوشل میڈیا انفلونسر کی تعریف بھی شامل کی گئی ہے، جس کے مطابق ایسا کوئی بھی شخص یا ادارہ جو سوشل میڈیا پلیٹ فارم کے ذریعے آمدن حاصل کرتا ہے، اس قانون کے دائرہ کار میں آئے گا۔

حکومت کا کہنا ہے کہ اس اقدام کا مقصد تیزی سے بڑھتی ہوئی ڈیجیٹل معیشت کو ٹیکس نیٹ میں لانا اور مختلف شعبوں میں ٹیکس نظام کو یکساں بنانا ہے۔ مجوزہ اقدام سے یوٹیوب، فیس بک، ٹک ٹاک، انسٹاگرام اور دیگر ڈیجیٹل پلیٹ فارمز سے آمدن حاصل کرنے والے افراد متاثر ہوں گے۔

فنانس بل کی منظوری کے بعد یہ ٹیکس نئے مالی سال سے نافذ العمل ہوگا۔