تہران(نیشنل ٹائمز) ایران کے وزیر خارجہ عباس عراقچی نے اپنے ایک بیان میں کہا ہے کہ ایران جنگ نہیں چاہتا، تاہم اگر اس پر کوئی جارحیت مسلط کی گئی تو وہ اپنے دفاع میں بھرپور جواب دے گا۔
عراقچی کا یہ بیان ایران کے خبر رساں ادارے تسنیم کے ایکس اکاؤنٹ پر جاری ہوا ہے۔
عراقچی کا کہنا تھا کہ تہران اپنے مؤقف میں واضح ہے اور کسی بھی ممکنہ حملے کی صورت میں اپنی خودمختاری کے تحفظ کے لیے اقدامات کرے گا۔
ایرانی وزیر خارجہ نے کہا کہ امریکا اور اسرائیل نے یو اے ای کی سرزمین ہمارے خلاف استعمال کی، ہمارے پاس ان دعوؤں کے دستاویزی ثبوت ہیں، دکھا سکتے ہیں۔
عباس عراقچی نے کہا کہ بعض فوجی کارروائیوں میں متحدہ عرب امارات نے خود بھی حصہ لیا، متحدہ عرب امارات سے ہمارے خراب تعلقات کی وجہ ان کا اسرائیل سے تعلق ہے، یو اے ای دیگر خلیجی ممالک کی طرح پالیسی اپناتا تو ہمارے تعلقات کہیں بہتر ہوتے۔
اس سے پہلے ایرانی وزارتِ خارجہ کے ترجمان نے کہا تھا کہ کویت اور بحرین ایران پر امریکی حملوں کیلئے براہ راست ملوث ہیں، ایران دفاع کا حق محفوظ رکھتا ہے،کسی بھی حملے کا بھرپور جواب دیا جائے گا۔
