لاہور،راولپنڈی(نیشنل ٹائمز)سکول ایجوکیشن ڈیپارٹمنٹ پنجاب نے صوبے بھر کے سرکاری و نجی سکولوں میں موسمِ گرما کی تعطیلات کے دوران سمر کیمپس لگانے کی اجازت دے دی، سمر کیمپس یکم جون سے 30 جون 2026 تک جاری رہیں گے ۔ سمر کیمپس پیر سے جمعرات تک کیے جائیں گے جبکہ جمعہ کو تعطیل ہوگی۔ کیمپس کا وقت صبح 7 بجے سے 10 بجے تک مقرر کیا گیا ہے اور تمام کلاسز کے طلبہ ان میں شرکت کرسکیں گے ۔محکمہ تعلیم نے ہدایت کی ہے کہ نجی سکول سمر کیمپس کے نام پر کوئی اضافی فیس وصول کریں گے نہ ہی سرکاری سکول کسی قسم کی ٹیوشن فیس لیں گے ۔ طلبہ کی شرکت لازمی نہیں ہوگی اور والدین کی اجازت ضروری قرار دی گئی ہے ۔  سکول انتظامیہ کو ہدایت کی گئی ہے کہ تمام سرگرمیاں کلاس رومز یا انڈور ماحول میں کی جائیں۔صاف پانی، پنکھوں، بجلی کے بیک اپ، فرسٹ ایڈ اور دیگر بنیادی سہولیات کی فراہمی یقینی بنائی جائے ، محکمہ تعلیم نے مزید واضح کیا ہے کہ سمر کیمپس میں یونیفارم لازمی نہیں ہو گا اور طلبہ موسم کے مطابق آرام دہ لباس پہن سکیں گے ۔