بیجنگ (شِنہوا) چین کے اعلیٰ قانون ساز ژاؤ لے جی نے جمعرات کے روز امریکہ پر زور دیا ہے کہ وہ چین اور اس کی ترقی کو معقول اور معروضی انداز میں دیکھے۔ انہوں نے مزید امریکی قانون سازوں کو چین کا دورہ کرنے کی دعوت دی۔
ژاؤ لے جی، جو قومی عوامی کانگریس (این پی سی) کی قائمہ کمیٹی کے چیئرمین ہیں، نے یہ بات امریکی سینیٹ کے ایک وفد سے ملاقات کے دوران کہی جس کی قیادت مونٹانا سے تعلق رکھنے والے ریپبلکن سینیٹر سٹیو ڈینز کر رہے تھے۔
ژاؤ نے کہا کہ چین اور امریکہ کے تعلقات کی مستحکم، صحت مند اور پائیدار ترقی دونوں ممالک کے عوام کے مشترکہ مفادات اور عالمی برادری کی عمومی توقعات کے مطابق ہے۔
انہوں نے کہا کہ گزشتہ سال سے دونوں سربراہان مملکت کی تزویراتی رہنمائی میں چین اور امریکہ کے تعلقات مجموعی طور پر استحکام کی جانب بڑھے ہیں۔ چین امریکہ کے ساتھ مل کر دونوں سربراہان مملکت کے درمیان طے پانے والے اہم اتفاق رائے پر عملدرآمد، بات چیت اور رابطوں کو مضبوط بنانے، اختلافات کو مناسب طریقے سے سنبھالنے اور عملی تعاون کو وسعت دینے کے لئے تیار ہے۔
ژاؤ نے کہا کہ تائیوان کا مسئلہ چین کے بنیادی مفادات کا مرکز اور دوطرفہ تعلقات میں سب سے اہم مسئلہ ہے۔ انہوں نے امریکہ پر زور دیا کہ وہ ایک چین کے اصول کی پاسداری کرے اور تائیوان کے مسئلے کو احتیاط سے نمٹائے۔
انہوں نے مزید کہا کہ چین کی قومی عوامی کانگریس امریکی کانگریس کے ساتھ روابط بڑھانے اور مزید تبادلوں اور دوروں کے فروغ کے لئے تیار ہے۔