مکاؤ (شِنہوا) چین کے مکاؤ خصوصی انتظامی علاقے (ایس اے آر) اور صوبہ گوانگ ڈونگ کے شہر ژوہائی کے حکام نے جمعرات کے روز ہینگ چھن بندرگاہ پر واقع مشترکہ خدمات کی ون سٹاپ راہداری میں سمارٹ امیگریشن کلیئرنس کا آغاز کر دیا جس کا مقصد مکاؤ اور ہینگ چھن میں قائم گوانگ ڈونگ-مکاؤ تعاون زون کے درمیان سرحد پار سفر کو مزید موثر بنانا ہے۔
یہ خدمات مکاؤ خصوصی انتظامی علاقے کی پبلک سکیورٹی پولیس فورس (سی پی ایس پی)، ژوہائی کی سکیورٹی اور امیگریشن حکام اور ہینگ چھن تعاون زون کے متعلقہ اداروں کے مشترکہ تعاون سے شروع کی گئی ہیں۔
مکاؤ خودمختار علاقے کی پولیس کے مطابق وہ ڈرائیورز جنہوں نے رجسٹریشن مکمل کر لی ہے، اب امیگریشن کلیئرنس کے دوران ون سٹاپ راہداری پر اپنے کاغذی دستاویزات دکھانے کے پابند نہیں ہوں گے۔ اس کے بجائے وہ صرف فنگر پرنٹ اور چہرے کی شناخت کی تصدیق کے ذریعے تیز رفتار کلیئرنس حاصل کر سکیں گے جس سے ہینگ چھن اور مکاؤ کے درمیان سرحدی عمل مزید تیز ہو جائے گا۔
یہ سمارٹ امیگریشن نظام پہلی بار نومبر 2025 میں ہینگ چھن بندرگاہ پر مسافروں کے معائنہ ہال اور گاڑیوں میں موجود مسافروں کے لئے امیگریشن کلیئرنس ہال میں نصب خودکار مشترکہ معائنہ راہداریوں پر نافذ کیا گیا تھا۔ 30 اپریل تک 2 لاکھ 80 ہزار سے زائد اہل افراد رجسٹر ہو چکے تھے۔
مکاؤ کے رہائشی مسٹر تونگ نے شِنہوا کو بتایا کہ وہ اپنے خاندان کے ساتھ تفریح اور کھانے کے لئے اکثر ہینگ چھن جاتے ہیں۔ انہوں نے کہا کہ اب سفر کے دوران دستاویزات نکالنے کی ضرورت نہیں رہی، اب یہ بہت آسان ہوگیا ہے۔