واشنگٹن (شِنہوا) ایک نئے سروے کے مطابق امریکی شہریوں کی اکثریت کا خیال ہے کہ ایران کے خلاف فوجی طاقت کا استعمال امریکہ کا ایک غلط اقدام تھا۔
واشنگٹن پوسٹ، اے بی سی نیوز اور اپسوس کے سروے کے مطابق 61 فیصد امریکی شہریوں کا کہنا ہے کہ ایران کے خلاف فوجی طاقت کا استعمال غلط تھا جبکہ 10 میں سے 2 سے بھی کم افراد کا ماننا ہے کہ ایران میں امریکی اقدامات کامیاب رہے ہیں۔
سروے کے مطابق تقریباً 10 میں سے 4 افراد کا کہنا ہے کہ یہ ناکام رہا جبکہ مزید 10 میں سے 4 افراد کے مطابق ابھی کچھ کہنا قبل از وقت ہے۔
واشنگٹن پوسٹ کے مطابق ایران کی جنگ ’’امریکیوں میں اتنی ہی غیر مقبول ہے جتنی 2006 میں عراق جنگ اپنے عروج کے دوران اور 1970 کی دہائی کے اوائل میں ویتنام جنگ تھی۔‘‘
سروے میں یہ بھی بتایا گیا کہ ریپبلکنز کے درمیان جنگ کی حمایت اب بھی زیادہ ہے اور 79 فیصد کے مطابق یہ درست فیصلہ تھا۔
اس کے علاوہ بیشتر امریکی شہریوں کا خیال ہے کہ ایران کے خلاف امریکی فوجی کارروائی ممکنہ خطرات بھی رکھتی ہے۔ ان میں سے 61 فیصد کا ماننا ہے کہ اس سے امریکی شہریوں کو نشانہ بنانے والی دہشت گردی کے خطرات میں اضافہ ہوگا۔ 60 فیصد کے مطابق اس سے امریکی معیشت کے کساد بازاری کا شکار ہونے کے امکانات بڑھیں گے جبکہ 56 فیصد کا کہنا ہے کہ امریکی اقدامات سے اتحادی ممالک کے ساتھ تعلقات کمزور ہونے کا خدشہ ہے۔