لوساکا (شِنہوا) چین اور زیمبیا نے ایک معاہدے پر دستخط کئے ہیں جس کے تحت چین زیمبیا کو گرانٹ فراہم کرے گا تاکہ باہمی طور پر طے شدہ تعاون کے منصوبوں پر عملدرآمد کیا جا سکے۔
زیمبیا کے دارالحکومت لوساکا میں منعقدہ تقریب سے خطاب کرتے ہوئے زیمبیا میں چین کے سفیر ہان جنگ نے کہا کہ یہ معاہدہ دونوں ممالک کے درمیان دوستانہ تعلقات کا ایک اہم مظہر ہے۔
ہان جنگ نے کہا کہ “اس معاہدے پر دستخط زیمبیا کے عوام کے لئے چین کی مخلصانہ حمایت کا ایک اہم اظہار ہے۔ چینی حکومت اور عوام ہمیشہ زیمبیا کی حکومت اور عوام کے ساتھ کھڑے رہے ہیں۔”
ہان جنگ نے کہا کہ چین زیمبیا کو گرانٹ کی صورت میں معاونت جاری رکھے گا۔ انہوں نے اس بات پر زور دیا کہ چین انسانی وسائل کی تربیت سمیت صلاحیت سازی کے پروگراموں کے ذریعے ملک کو خود انحصاری پر مبنی ترقی حاصل کرنے میں بھی مدد فراہم کر رہا ہے۔
چینی سفیر نے کہا کہ گزشتہ سال تقریباً زیمبیا کے 400 سرکاری عہدیداروں اور تکنیکی ماہرین کو مختلف شعبوں میں تربیت کے لئے چین مدعو کیا گیا تاکہ زیمبیا کی صلاحیتوں کو مضبوط بنایا جا سکے۔
ہان جنگ نے مزید کہا کہ چین تمام شعبوں میں زیمبیا کے ساتھ تعاون کو فروغ دینے اور مشترکہ طور پر جدیدیت کی جانب پیش رفت کے لئے پرعزم ہے۔
دوسری جانب زیمبیا کے وزیر خزانہ ستمبیکو موسوکوتوانے نے چینی حکومت کا شکریہ ادا کرتے ہوئے کہا کہ یہ معاہدہ دونوں ممالک کی قیادت کے فیصلوں کا نتیجہ ہے۔