اسلام آباد(نیشنل ٹائمز) سپیکر قومی اسمبلی سردار ایاز صادق نے قومی احتساب بیورو (نیب) کی جانب سے 6.213ٹریلین روپے کی تاریخی ریکوری کو سراہا۔ انہوں نے ادارہ جاتی اصلاحات کے نتیجے میں نیب کی عوام اور کاروبار دوست ادارے میں تبدیلی کو بھی قابلِ تحسین قرار دیا۔ انہوں نے ان خیالات کا اظہار چیئرمین نیب لیفٹیننٹ جنرل (ر) نذیر احمد سے پارلیمنٹ ہاؤس اسلام آباد میں ملاقات کے دوران کیا۔ چیئرمین نیب نے سپیکر کو نیب کی سالانہ رپورٹ 2025 پیش کی۔ سپیکر نے چیئرمین نیب کی قیادت کو سراہتے ہوئے کہا کہ ان کی سربراہی میں نیب نے 6.213 ٹریلین روپے (22 ارب ڈالر ) کی ریکارڈ ریکوری کی جو 1999 میں ادارے کے قیام کے بعد اب تک کی سب سے بڑی سالانہ ریکوری ہے ۔ انہوں نے مزید کہا کہ گزشتہ تین برسوں کے دوران نیب کی مجموعی ریکوریز 11.524 ٹریلین روپے (تقریباً 41 ارب امریکی ڈالر) تک پہنچ چکی ہیں جن میں سے صرف 2025 کی ریکوری نصف سے زائد بنتی ہے اور یہ گزشتہ 23 برسوں کی مجموعی ریکوری سے تیرہ گنا زیادہ ہے ۔