پشاور (نیشنل ٹائمز) وزیراعلیٰ خیبر پختونخوا سہیل آفریدی نے وزیراعظم شہباز شریف کو خط لکھ کر بانی پی ٹی آئی عمران خان اور ان کی اہلیہ بشریٰ بی بی کو عید کے موقع پر اہل خانہ سے ملاقات کی سہولت فراہم کرنے کی درخواست کی ہے۔

وزیراعلیٰ سہیل آفریدی نے خط میں کہا کہ قیدیوں کو اہل خانہ سے ملاقات کا حق قانونی اور انسانی ہمدردی کے تحت یقینی بنایا جانا چاہیے اور یہ معاملہ پہلے بھی اٹھایا جا چکا ہے۔

ان کا کہنا تھا کہ جیل مینوئل اور عدالتی احکامات کے باوجود بنیادی حقوق کی فراہمی میں رکاوٹ تشویشناک ہے، اور قیدیوں کو اہل خانہ سے ملاقات اور طبی سہولیات فراہم کرنا ریاست کی قانونی ذمہ داری ہے۔

وزیراعلیٰ نے خط میں مزید کہا کہ قانون کی روشنی میں بانی پی ٹی آئی اور ان کی اہلیہ کے حقوق فراہم کیے جائیں اور فوری ہدایات جاری کی جائیں تاکہ ان کے قانونی حقوق کو یقینی بنایا جا سکے۔