اقوام متحدہ (شِنہوا) اقوام متحدہ کے نئے سیکرٹری جنرل کے عہدے کے لئے مزید 2 امیدواروں کو نامزد کر دیا گیا ہے۔
اقوام متحدہ کی جنرل اسمبلی (یو این جی اے) کی سرکاری ویب سائٹ پر شائع ہونے والی دستاویزات کے مطابق افریقی یونین کے موجودہ صدر برونڈی نے سینیگال کے سابق صدر میکی سال کو اس عہدے کے لئے نامزد کیا ہے جبکہ کوسٹا ریکا نے ماہر معیشت اور کوسٹا ریکا کی سابق نائب صدر ربیکا گرینسپان کو نامزد کیا ہے۔
2 نئی نامزدگیوں کے بعد اب اس عہدے کے لئے 4 امیدوار میدان میں ہیں۔ دیگر امیدواروں میں چلی کی سابق صدر مشل باشلیٹ جنہیں چلی، برازیل اور میکسیکو نے نامزد کیا ہے اور بین الاقوامی ایٹمی توانائی ایجنسی کے موجودہ ڈائریکٹر جنرل رافیل گروسی جنہیں ارجنٹائن نے نامزد کیا ہے، شامل ہیں۔
اقوام متحدہ کے رکن ممالک کے نام لکھے گئے خط میں جنرل اسمبلی کی صدر اینا لینا بیئربوک نے امیدواروں کے ساتھ باہمی مکالمے کا طریقہ کار بیان کیا ہے، یہ مکالمہ20 اپریل کے ہفتے میں منعقد ہوگا۔
خط کے مطابق یہ مکالمہ اقوام متحدہ کے تین ستونوں پر مبنی ہو گا جنہیں امن و استحکام، انسانی حقوق اور ترقی کے نام سے جانا جاتا ہے۔ ہر امیدوار اس حوالے سے اپنا نکتہ نظر پیش کرے گا، جس کے بعد رکن ممالک کی طرف سے سوالات اور بات چیت کا دور ہو گا۔
خط میں مزید کہا گیا ہے کہ باہمی مکالمے کے لئے نامزدگیاں لازماً پہلے ارسال کی جانی ہوں گی، یکم اپریل کے بعد نامزد کئے جانے والے امیدوار حصہ لینے کے اہل نہیں ہوں گے۔