تہران (شِنہوا) ایران کے ایک اعلیٰ سکیورٹی عہدیدار نے کہا ہے کہ ملک نئی لیڈرشپ کے انتخاب تک قیادت کی ذمہ داریاں سنبھالنے کے لئے ایک عبوری کونسل قائم کرے گا۔
ایران کی سپریم نیشنل سکیورٹی کونسل کے سیکرٹری علی لاریجانی نے سرکاری نشریاتی ادارے آئی آر آئی بی ٹی وی کو انٹرویو میں یہ بات اس وقت کہی جب چند گھنٹے قبل ملک نے تصدیق کی کہ سپریم لیڈر آیت اللہ علی خامنہ ای ہفتے کے روز تہران میں امریکہ اور اسرائیل کے حملوں میں شہید ہو گئے ہیں۔
لاریجانی نے کہا کہ ایران کے آئین کے آرٹیکل 111 کے مطابق اگر ملک میں قیادت کا خلا پیدا ہو جائے تو صدر، عدلیہ کے سربراہ اور آئینی کونسل کے ایک جج عارضی طور پر رہبر کی ذمہ داریاں سنبھالیں گے۔
انہوں نے مزید کہا کہ یہ کونسل جلد از جلد تشکیل دی جائے گی۔
سکیورٹی کونسل کے سربراہ نے کہا کہ پوری قوم غمزدہ اور غصے میں ہے اور اسرائیل اور امریکہ کی کارروائیوں کا جواب دے گی۔
لاریجانی نے خبردار کیا کہ اسرائیل پورے مغربی ایشیا کے خطے پر غلبہ حاصل کرنے کے لئے ایران کو تقسیم کرنا چاہتا ہے، جبکہ امریکہ اسرائیل کے جال میں پھنس چکا ہے۔
انہوں نے زور دے کر کہا کہ بظاہر امریکی صدر ڈونلڈ ٹرمپ کے “امریکہ فرسٹ” کے نعرے کے باوجود اسرائیل امریکہ کی اولین ترجیح بن چکا ہے اور اسرائیل نے امریکہ پر غلبہ حاصل کر لیا ہے۔
ہفتے کی صبح اسرائیل اور امریکہ نے تہران اور دیگر ایرانی شہروں، جن میں تبریز، قم، اصفہان، کرمان شاہ اور کراج شامل ہیں، پر مشترکہ حملے کئے۔ ایران نے جواب میں اسرائیل اور خطے میں موجود امریکی اڈوں کو میزائل اور ڈرون حملوں کا نشانہ بنایا۔
حملوں میں ایران کے کئی اعلیٰ عہدیدار بھی مارے گئے، جن میں ایرانی مسلح افواج کے چیف آف سٹاف عبدالرحیم موسوی، وزیر دفاع عزیز نصیرزادہ، دفاعی کونسل کے سیکرٹری علی شمخانی اور اسلامی انقلابی گارڈ کور کے کمانڈر انچیف محمد پاکپور شامل ہیں۔