واشنگٹن (شِنہوا) امریکی صدر ڈونلڈ ٹرمپ نے کہا ہے کہ امریکی افواج ایران کے خلاف ایک ’’بڑی اور جاری‘‘ فوجی کارروائی انجام دے رہی ہیں تاکہ اس کے میزائلوں کو تباہ کیا جائے اور اس کی میزائل صنعت کو مکمل طور پر ختم کر دیا جائے۔
ٹرمپ نے اپنے سوشل میڈیا پلیٹ فارم ٹروتھ سوشل پر جاری ایک ویڈیو پیغام میں کہا کہ امریکی فوج ایک بڑی اور مسلسل کارروائی انجام دے رہی ہے۔ ہم ان کے میزائلوں کو تباہ کریں گے اور ان کی میزائل صنعت کو زمین بوس کر دیں گے۔
سی این این کو ذرائع نے بتایا کہ ٹرمپ کے اس دعوے کی امریکی انٹیلی جنس کی جانب سے تصدیق نہیں ہوتی کہ ایران ایسے میزائل تیار کر رہا ہے جو امریکہ تک پہنچ سکتے ہیں۔
ٹرمپ نے ایرانی عوام سے یہ بھی کہا کہ امریکی فوجی کارروائیوں کے اختتام کے بعد وہ حکومت سنبھال لیں۔
اسی دوران ٹرمپ نے تسلیم کیا کہ ایران پر حملے کے نتیجے میں امریکی جانی نقصان بھی ہو سکتا ہے۔ انہوں نے کہا کہ “ہمارے جانی نقصانات ہو سکتے ہیں۔ جنگ میں ایسا اکثر ہوتا ہے۔”
ادھر کینٹکی سے تعلق رکھنے والے ریپبلکن رکن کانگریس تھامس میسی نے سوشل میڈیا پر ایک بیان میں ایران پر حملوں کو “کانگریس کی اجازت کے بغیر کئے گئے جنگی اقدامات” قرار دیتے ہوئے ان پر تنقید کی۔